UVIÉU, 15 Mar. (EUROPA PRESS) -
El catedráticu de dialectoloxía de la Universidá d'Uviéu, Xosé Lluis García Arias, que presentó esti xueves el 'Diccionariu Etimolóxicu de la Llingua Asturiana', afirmó que gracies a esti trabayu naide va poder volver dicir "que l'asturianu tien palabres inventaes 'porque yo eso nunca lo sentí'".
El fundador de la histórica asociación Conceyu Bable, que dio orixe al movimientu asturianista modernu, y ex-presidente de l'Academia de la Llingua presentó güei énte un Aula Magna de la Universidá enllena, el primer tomu d'esti trabayu. Nel actu tamién participaron el rector, Santiago García Granda; el presidente de l'Academia, Xosé Antón González Riaño; y el catedráticu Michael Metzeltin, ún de los máximos espertos mundiales nel estudiu de les llingües romániques.
El 'Diccionariu Etimolóxicu' ye una obra científica dedicada a la descripción interna del idioma asturianu y una ferramienta que nun tienen tovía otres llingües peninsulares como'l gallegu. Pel momentu publicóse'l primer tomu --les lletres A y B-- y l'Academia espera completalu nos dos años próximos hasta sumar unos seis exemplares.
En declaraciones a los medios, Arias esplicó que, nel casu d'Asturies, pudo empezar a falase de la ellaboración d'esta obra "porque tenemos muncha documentancion medieval y munches palabres recoyíes". Asina, afirmó que los asturianos "tenemos un gran vocabulariu, lo que nos permite sacar conclusiones, analizalo y ver que rellación pue tener con otres llingües".
Nesi sentíu, calificó'l diccionariu como "un elementu más a favor de la normalización del idioma". "Nun se pue dicir más n'Asturies qu'una palabra ta inventada porque yo eso nunca la sentí, que vaigan a mirar les fontes d'información, los diccionarios, y vean si eso que nunca sintieron existe o non", sentenció Arias, qu'indicó qu'esta obra va valir "pa que la xente s'informe enantes de falar".
Per otru llau, el presidente de l'Academia, Xosé Antón González Riaño, dixo que, dende'l puntu de vista filolóxicu y científicu, una llingua que tien diccionariu etimolóxicu "tien una carta de presentación que l'afita como idioma con personalidá propia". "Dende un puntu de vista cientificu, una llingua con gramática, diccionariu, normes y un diccionariu etimolóxicu qu'esplique les sos ferramientes internes ye una llingua con gran futuru", sentenció.
'BABLE DE LLABORATORIU'
Otra manera, a preguntes d'Europa Press, tanto García Arias como González Riaño opinaron sobre les declaraciones de la líder de los 'populares' asturianos, Mercedes Fernández, que davezu califica l'asturianu normativu como 'bable de laboratorio'.
Nesi sentíu, Riaño afirmó qu'estes palabres son "declaraciones propies del siglu pasáu" y que l'asturianu tien una institución encargada de la so normativización igual que'l castellanu, "que tien la RAE, que normativiza y incorpora palabres nueves".
"Ye un argumentu ensin sentíu dende'l puntu de vista llingüísticu", dixo'l presidente de l'Academia, que señaló que'l 'Diccionariu Etimolóxicu' contribúi "a desfacer el mitu de los 'mil bables', porque muestra que l'asturianu tien una gran unidá interna".
Per otru llau, sobre les palabres de la líder del PP asturianu, Arias señaló que calificar l'asturianu estándar como 'bable de laboratorio' ye "que nun se sabe lo que ye un llaboratoriu".
