UVIÉU, 14 Mar. (EUROPA PRESS) -
El Principáu va reforciar el so compromisu cola investigación, el desarrollu y la innovación al traviés de la creación d'un conseyu consultivu formáu por profesionales d'escelencia, según anunció esti miércoles el conseyeru de Presidencia, Guillermo Martínez.
El conseyeru d'Empléu, Industria y Turismu, Isaac Pola, espunxo nel Conseyu de Gobiernu los criterios pa la selección del grupu d'investigadores, según esplicó Martínez na rueda de prensa posterior.
Los oxetivos que busca esta iniciativa son la formación d'un grupu d'investigadores d'escelencia que tomen distintos campos d'actividá y ufran distintos puntos de vista; o la representación d'árees de conocencia vinculaes a la Estratexa d'Especialización Intelixente RIS3, ensin desdexar les relaciones coles redes internacionales de ciencia y investigación, la relación coles empreses o la divulgación científica.
A ello suma la participación d'árees rellacionaes coles ciencies sociales y les humanidaes dedicaes al estudiu del impactu social de la ciencia y la investigación; la participación de los sectores investigadores rellacionaos col aceru y l'aluminiu; la inclusión de la perspectiva de xéneru, pa impulsar el protagonismu de la muyer nel desarrollu científicu y tecnolóxicu; y la conocencia de la xestión de la ciencia y la investigación, tanto a nivel nacional como européu.
A partir d'estos criterios, que se debatieron y aceptaron pol Executivu, el titular d'Industria va encargase d'ellaborar una propuesta de candidatos pa formar parte del conseyu consultivu. Una vez fecha la selección, va facese la constitución del conseyu, nel que tamién van participar otres conseyeríes del Principáu y l'Universidá d'Uviéu. El Gobiernu confía en poder facelo "a lo llargo del primer semestre".
Actualmente, la Conseyería d'Empléu, Industria y Turismu trabaya tamién na ellaboración del nuevu Plan de Ciencia y Tecnoloxía, que tien que tar rematáu na seronda.
