UVIÉU, 20 Jul. (EUROPA PRESS) -
L'actual alcaldesa de Xixón, Carmen Moriyón, anunció esti vienres la so intención d'encabezar la candidatura a la presidencia del Principáu d'Asturies al mandu de Foru. "Ufiérto-yos a los mio compañeros la mio candidatura a la presidencia de Foru y con eso la mio intención de presentame a les elecciones", anunció la rexidora de Xixón que recibió una amplia ovación de los miembros de Foru presentes na sala.
"Toi dispuesta a liderar pa la rexón el proyectu de cambiu que defende Foru pa la nuestra tierra y fáigolo porque considero una obligación intentalo", dixo Carmen Moriyón énte una sala na qu'en primer fila taba'l fundador y secretariu del partíu, Francisco Álvarez Cascos.
Asina, indicó qu'agora lo que-y toca ye trabayar nestos dos meses de manera intensa" pa que'l día 29 de setiembre pueda cuntar col apoyu de tolos compañeros. "Toi mui ilusionada y con munches ganes" dixo Moriyón.
Aseguró que la decisión ye "personal dafechu" y nun respuende a pidimientu dalgún del partíu, anque indicó que foi determinante l'apoyu recibíu de compañeros de la formación a los que dio les gracies.
Na so comparecencia énte los medios Carmen Moriyón recordó'l momentu nel que firmó la so fueya d'afiliación a Foru, hai yá siete años y estimó'l trabayu de tolos conceyales del so grupu. Asina, incidió en que Foru ye "el so únicu partíu, al únicu que tuvo afiliada, ye la so casa y son los sos compañeros". Añadió que confía en que "toos van caminar xuntos nesta etapa nueva".
Indicó qu'a día de güei tien un compromisu colos xixoneses que la escoyeron y esi compromisu tien que siguir intactu hasta'l día del relevu nes próximes elecciones. Asina dixo que naide va notar cambiu dalgún y sigue col enfotu de rematar el proyectu que principió en Xixón.
"A la política nun pue venise pa facer lo que se quier, sinón lo que se pue; a dialogar y non a facer monólogos; a negociar y non a imponer. A nós tocónos gobernar nun tiempu adversu y con circunstancies bien concretes pero aprendí que nun se pue gobernar de llombu a la xente", manifestó Moriyón.
Nesti sentíu la rexidora xixonesa aseguró qu'Asturies necesitarealismu p'acometer los cambeos. "Los ciudadanos pídennos qu'escuchemos, acompañémoslos y busquemos les soluciones que necesiten. Son munches les voces que piden un cambiu que nun vaiga contra naide, una cambiu qu'una", manifestó.
Preguntada pol papel que considera tien qu'adoptar Francisco Álvarez Cascos nel proyectu de partíu indicó que, Cascos "ye una persona de la máxima relevancia na formación, de la que naide debate y que va tener el papel que'l quiera tener"
Moriyón fixo esti anunciu depués de la celebración d'una xunta de la directiva rexonal na que tamién tuvieron presentes los conceyales de Foru nel Conceyu de Xixón. Agora los pasos a dar son la recoyida d'avales "d'oriente a occidente", con un plazu qu'acaba'l seis de setiembre pa que la candidatura o les candidatures si hubiera más d'una, queden proclamaes esi mesmu mes.
