UVIÉU, 20 Jul. (EUROPA PRESS) -
La presidenta del PP asturianu, Mercedes Fernández, anunció que va votar por Sáenz de Santamaría nel XIX Congresu Nacional Estraordinariu del PP que va escoyer al sucesor de Mariano Rajoy.
Avanzólo al traviés d'unes declaraciones distribuyíes pol PP asturianu y realizaes al empiezu del Congresu, onde Fernández indicó que los dos candidatos son escepcionales, "pero necesariamente mañana hai que coyer una papeleta y tomar partíu y yo digo que voi votar por Soraya Sáenz de Santamaría".
Per otru llau, afirmó que-y "prestaría muncho" qu'hubiera una integración "porque Pablo ye un tíu escepcional, ye una persona d'idees, claru, esmolecida por España y mozu, lo que supón una bona renovación. Coles mesmes, esclarió que nel casu de que ganara Casado, tamién-y gustaría qu'integrara una llista única.
Sobre la posibilidá de qu'hubiera tiempu enantes de mañana pa la llista única afirmó que ye un tema que yá se-y escapa "porque somos de provincia y esto tien que cocinase nes altures". Con too, afirmó que tien la sensación de qu'a la "inmensa mayoría" de los compromisarios gustaría-yos ver una llista d'unidá, "pero parezme difícil abondo".
