UVIÉU, 20 Jul. (EUROPA PRESS) -
Podemos Asturies pidió a los sos diputaos nel Congresu, Sofía Castañón y Segundo González, que voten en contra de la llei de Cambiu Climáticu y Transición Enerxética propuesta por Unidos Podemos, al entender que nun ye "bona nin aceptable" al "destruyir empléu n'Asturies ensin ufiertar enantes alternatives reales y tanxibles".
Asina refugaron la propuesta d'Unidos Podemos en favor d'una transición "xusta y progresiva" n'Asturies. Nun comunicáu unviáu a los medios, Podemos afirmó que nun van aceptar "una iniciativa que nel so desarrolló nun cuntó con Asturies, polo xeneral, nin coles contornes afectaes sobremanera".
"Nun podemos almitir que se plantee una propuesta de transición enerxética ensin impulsar primeramente un diálogu con y dientro de les contornes afectaes", aseguraron.
Por eso, pidieron "dir acullá de negociar un compendiu de midíes planteaes por espertos na materia, partíos políticos o llexisladores", porque "los que soportaron a lo llargo de décades les cargues y les consecuencies de ser el pulmón enerxéticu d'España tienen que sentise escuchaos y implicaos, dende'l principiu, nes propuestes sobre'l futuru".
Criticaron amás que'l testu presentáu nun condicione la fecha de zarru de les centrales térmiques a l'articulación con anterioridá d'alternatives nes contornes afectaes nin incluya detalle nin memoria económica dalguna sobre los planes de reactivación y transición xusta.
"Namás pue facese un procesu de transición enerxética si primeramente desarrollen alternatives d'empléu cola mesma calidá y nes mesmes contornes que se van a ver afectaes por esti cambiu de modelu enerxéticu", aportunaron.
