UVIÉU, 19 Jul. (EUROPA PRESS) -
El diputáu del PP, David González Medina, acusó al Conseyeru d'Educación y Cultura, Genaro Alonso, d'utilizar medios públicos pa "imponer ese constructu artificial llamáu 'llingua'".
Según esplicó González Medina en declaraciones unviaes dende'l PP d'Asturies, el Conseyeru utilizó la circular d'empiezu de cursu "pa facer política y meter cuña ideolóxica". Al so xuiciu, la circular ye un documentu que tien como fin facilitar a los centros educativos y a los sos trabayadores la información y recursos necesarios pal cursu académicu nuevu al que tienen que facer frente.
González Medina llamentó que'l Conseyeru utilice recursos públicos "davezu" pa falar "de les bondaes del socialismu, del gobiernu socialista nuevu" y pa "imponer esi constructu artificial llamáu 'llingua'".
"Esi constructu artificial que quieren facer oficial y pal que s'utilicen medios públicos que pagamos tolos asturianos, campañes publicitaries de la Conseyería que pagamos toos, y toa suerte de lloxística en medios que pagamos toos pa promocionar una 'llingua' que tienen qu'estudiar los que quieran estudiala, non a los que-y venga en gana al conseyeru d'Educación", indicó.
"Dende'l PP esiximos al Conseyeru que dexe d'utilizar recursos y medios de toos pa imponer la so ideoloxía, el socialismu y los sos caprichos, como ye la imposición de la 'llingua'", afirmó.
Per otru llau, el PP afirmó que'l Conseyeru tendría qu'esplicar por qué Asturies ye la comunidá autónoma que más empioró nel informe PISA, o por qué los profesores asturianos son los que peores condiciones llaborales tienen n'España, o por qué les ayudes d'accesu pa les compres de llibros son les peores d'España.
"Y sobremanera lo que tendría qu'esplicar a la comunidá educativa ye porque'l gobiernu socialista decidió dinamitar el pactu educativu, imponiendo la so ideoloxía, atacando la enseñanza concertada y desaniciando una materia fundamental como ye la conocencia de la relixón católica", dixo p'acabar.
