UVIÉU, 25 May. (EUROPA PRESS) -
El PP de L.lena quier prohibir que nes actividaes festives que reciban una subvención municipal se faigan reivindicaciones polítiques y ideolóxiques "tanto orales como escrites". Nel casu de qu'asina asoceda, proponen que la entidá organizadora tenga que devolver la subvención.
Asina se recueye na moción que se ve a llevar esti vienres al Plenu del Conceyu dirixida a "cualquier fiesta de calter popular subvencionada con dineru públicu y entamada por asociaciones, colectivos o grupos de prensonas".
De llegar aprobase quedaría "prohibíu dafechu" qu'en nengún sitiu del espaciu festivu haya nengún tipu de conseña, pancarta o reivindicación política o ideolóxica "tanto oral como escrita". Nel casu qu'asina asocediera, según se recueye na moción, procederíase a la retirada inmediata de la subvención".
La midida surde depués que que'l PP de L.lena denunciara la "inaceptable politización" del 'Mercáu de La Flor de L.lena', entamáu pola Xunta Cultural Rebelgu y celebráu a mediaos d'abril.
L'allugamientu nel escenariu de los conciertos d'una pancarta qu'anunciaba la manifestación pola oficialidá del asturianu del 21 d'abril pasáu xeneró que'l PP anunciara que diba solicitar al Conceyu tola documentacion rellacionada cola contratacion de les fiestes mentaes "pa comprobar que too ta conforme a la llegalidá vixente" y pidieron tomar "midíes contundentes" pa desaniciar "actitúes que nun representen a tolos vecinos".
Per otru llau, dende Rebelgu acusaron PP de realizar una "politización" del Mercáu y afirmaron que como asociación independiente son llibres de reivindicar "lo que nos de la gana". Asina, consideraron l'actitú del PP de L.lena como un "auténticu atentáu contra la llibertá d'espresión".
