"Que sigan na so neciura, lo mío ye'l trabayu", diz l'empresariu sidreru cántabru

Botellas de sidra asturiana
EUROPA PRESS
Actualizado: jueves, 20 septiembre 2018 17:08

Diz que los productores que pleitien contra él nun quieren la patente de la botella p'Asturies, sinón pa ellos

UVIÉU, 20 Sep. (EUROPA PRESS

El responsable de Sidra Somarroza, la empresa qu'usa pa la so sidra natural una botella igual a la que s'emplea n'Asturies, reconoció que nun-y sospriende la decisión adoptada esti miércoles pola Asociación Sidra Asturiano (ASSA) - de siguir reclamando nos tribunales que-y prohiban usar esa botella. "Que sigan na so neciura, lo mío ye'l trabayu", dixo Jesús Gómez, en declaraciones a Europa Press.

Depués de qu'ASSA yá lu llevara a los tribunales nuna ocasión, el xulgáu de lo Mercantil númberu 1 de Santander dio-y la razón a esti empresariu, y declaró llegal que siga usando'l modelu de botella denomináu 'molde de fierro'. ASSA decidió recurrir esa sentencia a l'Audiencia Provincial de Cantabria.

Gómez dixo qu'esto nun ye un asuntu que pueda enfrentar a Asturies con Cantabria. Ye más, afirmó que tien "grandes amigos" que son productores n'Asturies y qu'él mesmu merca mazana a productores asturianos pa la ellaboración de la so sidra. "Que yo soi de Santander, de Renedo de Piélagos, que nun soi chinu", ilustró.

Afirma qu'hai productores asturianos que-y dan la razón, anque lo faen en priváu. Mentes, hai otru productores que tán interesaos en siguir col pleitu alantre por razones bien distintes a l'asturianía, sostién.

"La xente tien que saber qu'estos señores nun rexistraron la botella a nome d'Asturies; fixéronlo nel so beneficiu, de l'asociación, esto ye, que piensen que la botella ye de so, pa remanala al so gustu", señaló. Recordó que la botella diseñóse hai más de cien años, mentes que l'asociación buscó patentala apocayá.

La conclusión que saca Gómez ye que "saben que la tienen mal patentada" y dende ASSA tán buscando dalguna resolución xudicial que-yos dea la razón.

HISTORIA

En declaraciones a Europa Press, Gómez diz qu'enantes de xudicializar l'asuntu, dende ASSA esixéron-y que dexara d'utilizar esi tipu de botella. Afirma que-yos propunxo dir a Asturies pa falar del asuntu y que-y dixeron que non. "Ye más, ufiertéme a ser parte de l'asociación y tamién me lo negaron", apuntó.

"De xuru que si lo pudiéremos falar, solucionaríase ensin problemes", afirmó, polo que deduz que detrás d'esa demanda hai otres coses.

"Yo sé lo que dicen munchos pequeños productores d'Asturies y lo cierto ye que tienen tanto mieu como yo, bono; la verdá ye que tán en peor situación que yo, porque ellos nun pueden cambiar el modelu de botella", dixo.

En realidá, el responsable de Sidra Somarroza esplicó que comercializa dellos tipos de sidra y precisamente onde menos gana ye nel sector de sidra natural. Por eso, nun-y supondría un perxuiciu grave abandonar esi diseñu. "Pero quieren siguir metiéndose conmigo en busca d'un argumentu pa tener el monopoliu del diseñu, pa que tolos productores pasen pel aru", indicó.

En too esti asuntu, Jesús Gómez, dixo que nun tien nada que ganar, sinón que perder. Amás dixo que la so sidra ye'l triple de cara que la que faen productores asturianos, polo que tener el mesmu tipu de botella tampoco supón beneficiu pa él. "Pero esi ye un tema comercial, que yo voi decidir, nun voi cambiar de botella porque vengan unos señores que dicen que'l diseñu ye de so", afirmó. "Esto llegué dici-ylo a xente de l'asociación, pero nun me dexaron dir falar con ellos, nun quieren igualo", dixo.

Asturianu ofrecido por