UVIÉU, 23 May. (EUROPA PRESS) -
Ediciones Trabe acaba de publicar '42.553. Depués de Buchenwald', de Xuan Santori, obra ganadora del Premiu d'Ensayu 'Máximo Fuertes qu'entrega cada añu'l Gobiernu asturianu. Nesti llibru, l'autor, conmovíu pol testimoniu vital de Vincent García, recueye nun ensayu históricu la reflexón sobre la condición humana y la supervivencia nel deliriu de los campos de concentración.
Nél recuéyese la vida de Vicente García Riestra (La Pola Siero, 1925), deteníu en Francia y deportáu nel 1944 pola Xestapo pal campu de concentración de Buchenwald, onde se persiguía la muerte de les persones internaes a través del trabayu esclavo pa la industria de guerra de l'Alemaña nazi.
"Vicente, el polesu, l'asturianu, l'últimu español superviviente d'aquel esterminiu, nun se da, tien voluntá de siguir, de dominar el mieu que lu apodera y d'adaptase a la situación, de facer por salvar y salvase, por vivir un día más. Sobrevivir pa pidinos que nun s'olvide, que nun vuelva pasar", indica l'autor nel llibru.
Xuan Santori (Uviéu, 1968) ye doctor en Filoloxía pola Universidá d'Uviéu y tien ganao dalgunos de los premios más importantes de la lliteratura asturiana. Amás, ye ún de los más importantes estudios de la lliteratura asturiana del Surdimientu.
Con esti ensayu nuevu, Santori resultó ser el ganador de la XXIII edición del Premiu 'Máximo Fuertes Acevedo' d'Ensayu que concede la Conseyería d'Educación y Cultura. El xuráu decidió por mayoría conceder el Premiu a '42.553. Depués de Buchenwald' al reconocer "el xuegu de ficción y realidá consiguío al traviés de la xuntura d'imaxe, testimoniu y documentación y la dimensión internacional qu'adquier la obra".
