UVIÉU, 26 d'Agostu (EUROPA PRESS)
Construcciones Alfredo Rodríguez (CAR), la empresa axudicataria de la obra del colexu uvieín Carmen Ruiz-Tilve, acusó a la Conseyería d'Educación d'incumplir los detalles de los plazos y la financiación de l'actuación fixaos nel contratu y nos pliegues de condiciones.
En dos escritos enviaos a la Conseyería, y remitíos tamién a los medios de comunicación, la constructora acusa al executivu de nun acutar una retención de creitu del 10% del presupuestu total, como fixa la llexislación, señalando la "insuficiencia o falta de creitu" pa realizar l'actuación.
Tamién critica la imposición, per parte de la Conseyería d'Educación, del entamu de los trabayos a fecha 1 de xunetu del 2014, lo que nun se correspondería, según la empresa, coles añalidaes presupuestaes nel contratu final: 395.421 euros pal 2014 y 2.090.408 euros pal 2015. Si se produz una execución llinial de la obra, afirma CAR, la aportació mensual habría ser de 165.700 euros y poro'l presupuestu nel 2014 habría ser de 994.000. La empresa pide pa esti añu, polo menos, una aportación de 684.000 euros.
En casu contrariu, CAR esplicó que tendría trés posibilidaes: empezar más tarde, empezar a ritmu ralentizáu o empezar na fecha esixida, pero paralizando l'actuación, una vez consumiérase la parte del presupuestu relativa al 2014. Amás, la empresa xustifica errores na planificación, na documentación, no referente a les llicencies y otres illegalidaes incluyíes nel proyectu, y que nun conoció hasta una vez firmáu'l contratu.
El Gobiernu asturianu acusó la selmana pasada a la empresa d'incumplir los términos del contratu.
