BILBO, 21 (EUROPA PRESS)
Euskal Autonomia Erkidegoak (EAE) 15.316 milioi euroko balioa duten ondasunak esportatu ditu 2018ko lehen zazpi hiletan, iaz baino 636,5 milioi gehiago, eta 11.701,6 milioi euro inguruko ondasunak inportatu ditu, 2017an baino 834 milioi gehiago. Horrela, EAEko ondasunen kanpo merkataritzak 3.614 milioi euroko saldo positiboa izan du urteko lehen zazpi hilabeteetan, Eustaten datuen arabera.
Herrialdeka, urtarriletik uztailera, Bizkaian izan dira EAEko esportaziorik handienak, guztira 6.183,2 milioi euro metaturekin eta %14,8ko hazkundearekin. Araban, hazkundea %10,8koa izan da (4.772,7 milioi euroko ondasunak esportatu dira), eta Gipuzkoan %5,0koa (4.360,1 milioi euro).
Produktu motari erreparatuta, produktu ez energetikoek egin diote ekarpenik handiena hazkundeari, 1.163 milioi euro gehiagorekin. Produktu energetikoek, berriz, 307,5 milio euroko ekarpena egin dute, guztia maila nominalean.
Esportazioen bolumenaren araberako bost jarduera adar garrantzitsuenek gorakadak izan dituzte urteko lehen zazpi hiletako datu metatuetan. Kokeak eta petrolio fintzeak jarduerarekin lotzen diren produktuen esportazioaren igoera nabarmendu da (%36,6), 334,1 milioi eurotan gainditu baitu aurreko urtean aldi berean esportatutakoa, guztira 1.246,1 milioi eurorekin. Era berean, motor ibilgailuen fabrikazioarekin lotzen diren produktuen esportazioa %15,2 hazi da (4.062,9 milioi), eta osotasunaren %26,5 hartu du.
Esportazioen helmuga diren herrialdeei dagokienez, 2018ko lehen zazpi hiletako zerrendako buru Alemania da, EAEk esportatutakoaren %15,6rekin, eta ondoren datoz Frantzia (%15,1) eta AEB (%8,5). Hiru herrialde horiek hartu dituzte euskal esportazioen %40 inguru.
INPORTAZIOAK
Bestalde, EAEn metatutako ondasunen inportazioa 11.701,6 milioi euro ingurukoa izan da urteko lehen zazpi hiletan, 2017ko aldi horretan erregistratutakoa baino 834 milioi gehiago. Produktu energetikoen inportazioa %8,2 gehitu da, eta produktu ez energetikoena %7,5.
Herrialdeka, Bizkaian erregistratu da inportazioaren gehikuntzarik handiena, 349,0 milioi euroko gehikuntzarekin (%41,8); Araban 267,2 milioi euroko gehikuntza erregistratu da, eta Gipuzkoan 217,8 milioi eurokoa.
Horrela, 2018ko lehen zazpi hiletan, EAEko ondasunen kanpo merkataritzak 3.614,4 milioi euroko saldo positiboa izan du, aurreko urteko aldi horretan erregistratutakoa baino 636,5 milioi gehiago. Horrela, %130,9ko estaldura tasa lortu da. Tasa hori 100etik gorakoa da, hau da, EAEk inportatzen duena baino gehiago esportatzen du, 28 herrialdeko Europar Batasuneko ia herrialde guztiekin -Irlandarekin, Luxenburgorekin eta Bulgariarekin izan ezik-.
