BILBO, 23 (EUROPA PRESS)
Espainiako 54. Matematika Olinpiadaren azken fasea jokatu zen martxoaren 15etik 17ra, Jaenen (Andaluzia), eta euskal ordezkariek bi domina lortu zituzten. Erik Terres Bilboko Eskolapioetako ikasleak zilarrezko domina eskuratu zuen, eta Roberto Villarejo Bilboko Nuestra Señora del Carmen ikastetxekoak brontzezkoa, Euskal Herriko Unibertsitateko (EHU) iturriek prentsa ohar bidez jakinarazi dutenez.
Matematika Olinpiada urtero egiten da Espainiako Matematikako Errege Elkartearen babesarekin. Bigarren Hezkuntzako ikasleen artean matematika ikasketak zabaltzea eta problema matematikoen ebazpenaren gaineko interesa areagotzea da helburua, betiere kirol eta zientzia giroan.
Estatuko unibertsitate barruti guztietan aldi berean jokatu diren fase autonomikoetan hautatu dira amaierako lehiaketara joan diren 76 parte hartzaileak. Azken fasean lehiatu diren euskal ordezkariak zorrotz aukeratu ziren Euskal Autonomia Erkidegoko (EAE) ikastetxe guztien artetik, eta hauek izan ziren lehen fasea gainditu eta azken faserako sailkatu ziren ikasleak: Erik Terres (Bilboko Eskolapioak), Jon Pineda (Leioako Askartza Claret) eta Roberto Villarejo (Bilboko Nuestra Señora del Carmen).
"Gure ordezkariek oso emaitza onak lortu dituzte: Erik Terresek zilarrezko domina irabazi du, eta Roberto Villarejok brontzezkoa. Era berean, uste dugu etorkizun oparoa izango duela gure hirugarren ordezkariak, Jon Pinedak, izugarrizko esperientzia lortu duelako eta oso gaztea delako, DBHko laugarren mailan baitabil", azaldu du Pedro Alegría EHUko Zientzia eta Teknologia Fakultateko Matematikako irakasleak.
Euskal ordezkaritzako kide guztiek "Matematika tailerra" egin dute. Orain dela zenbait urtetik ematen da tailerra, EHUko Zientzia eta Teknologia Fakultateko Matematika Ataleko irakasle batzuen ekimenez.
"Zorionak eman nahi dizkiegu Matematika Olinpiadako euskal ordezkariei, egin duten ahalegin eta lan handiagatik, eta espero dugu arrakasta hauek baliagarriak izango direla gure gainerako ikasleak motibatzeko eta gure erkidegoko hainbat hezkuntza alorrek sustatzen dituzten jardueretan parte hartzera animatzeko", esan du Alegría-k.
