BILBO, 19 (EUROPA PRESS)
Eusko Jaurlaritzak bulego berria inauguratu du Milanen astearte honetan. Arantxa Tapia Ekonomiaren Garapeneko eta Azpiegituretako sailburuak inaugurazioan ziurtatu duenez, bulegoa "funtsezkoa" izango da euskal enpresek Italian duten presentzia sendotzeko.
Javier Zarraonandia Industriako sailburuordea, Ainhoa Ondarzabal Nazioartekotzeko Euskal Agentziako zuzendaria eta Ainara Isasa Milango bulego berriaren zuzendaria izan dira inaugurazio ekitaldian. Horiekin batera, Alessandro Matinzzoli Lonbardiako Ekonomiaren Garapeneko ministroa, PROMOS Milango Merkataritza Ganberako ordezkariak eta Italian presentzia duten euskal enpresen ordezkariak izan dira ekitaldian.
Bere agerraldian, Tapiak Euskadiren indarguneak aurkeztu ditu eta Euskadik eta Italiak dituzten antzekotasunak nabarmendu ditu. Halaber, makina erremintaren edo aeronautikaren sektoreetan egon daitezkeen sinergiak ere aipatu ditu.
Jaurlaritzaren arabera, AEB edo Txina moduko urrutiko merkatuek eskaintzen dituzten aukerez gain, "Europak jarraitzen du Euskadirako merkaturik garrantzitsuena izaten". Horrela, Alemanian, Frantzian, Erresuma Batuan eta Italian daude gaur egun Euskadiko enpresen harreman gehienak.
Italia azken urteotako euskal esportazioen helmuga diren herrialdeen sailkapenean 4. eta 6. postuen bitartean dago, Frantziaren eta Alemaniaren ondoren eta Erresuma Batuarekin eta Herbehereekin txandakatzen.
Italiako industria jarduera iparraldean biltzen da batez ere (Milan, Turin eta Venezia). Italiak kultura esportatzaile handia du, eta puntako teknologia du makina erreminta, automobilgintza eta Pharmaren sektoreetan, besteak beste. Gainera, eremu askotan industria Euskadikoaren antzekoa den arren, sinergiarako aukera nabarmena da aeronautika, biotech, fabrikazio aurreratu edo robotikaren sektoreetan.
Halaber, Italia Europar Batasuneko nekazaritza ahalmen garrantzitsuenetako bat da, eta Euskadik tradizioan harreman estua izan du Lonbardiarekin elikaduraren eremuan. Euskadik eta Lonbardiak ulertzen dute nekazaritzako elikagaien sektoreak eta, bereziki, tokiko produktuekin lotura duen elikagaien industriak hazkuntza aukerak eskaintzen dituztela, lehen sektorearen garapen dibertsifikatuagoarekin eta orekatuagoarekin.
BILERA
Bestalde, Arantxa Tapia Alessandro Mattinzzoli Lonbardiako Garapeneko ministroarekin batu da, bulegoaren inaugurazioaren ondoren. Bi arduradunek Euskadi eta Lonbardia batzen dituzten gaiak egiaztatzeko aukera izan dute.
Horrela, Eusko Jaurlaritza eta Lonbardiako Gobernua kide dira Vanguard industrializazio maila altuko Europako eskualdeen sarean, eta Europa industrializatua eraikitzeak duen garrantzia zabaltzeko lanean ari dira.
Halaber, Tapia eta Mattinzzoli Espainiako eta Italiako gobernuetako egoera politikoez eta gertatu berri diren aldaketez mintzatu dira, eta sailburuak nabarmendu du Euskadin egonkortasunerako bide ematen duten politikak ezartzen jarraituko direla, ekonomiarako funtsezko faktore baita.
Euskadiko erakunde ordezkaritzak topaketa izango du asteazkenean Italian finkatuta dauden euskal enpresekin, eta Italiako merkatura sartzeko erronkak eta zailtasunak, herrialdearen egoera ekonomikoa eta enpresek epe ertainera dituzten ikuspegiak aztertuko dituzte, baita Eusko Jaurlaritzak egin ditzakeen laguntza ekintzetarako aukerak ere.
Gainera, gauean, euskal ordezkaritzak ekitaldi gastronomiko batean parte hartuko du. Bertan, euskal nekazaritzako elikagaiak sustatuko dira, eta, ostegunean, ordezkaritza Piamonte eskualdeko Bistagnora joango da, Danobat enpresaren instalazio berriaren inauguraziora.
