BILBO, 20 (EUROPA PRESS)
Getxoarte Getxoko Pratika Garaikideen Aretoak azken urteetan izan duen bilakaera handia aztertu ondoren, antolatzaileek erabaki dute etengabeko aldaketa ezinbestekoa dela ekimena era arrakastatsuan egiten jarraitu ahal izateko eta bere izaera hezitzailearen aldeko apustua egiteko. Horrela, Getxoarte ez da aldizkako ekimena izango eta urte osoan etengabe garatuko da, eta artearen sustapeneko kontzeptua deialdi publikoen bidez mantenduko da, Kultura Plan Estrategikoaren sormena bultzatzeko filosofiari jarraituta, Getxoko Kultur Etxetik jakinarazi dutenez.
Horrela, Getxoarteren zenbait jarduera eta programa urtean zehar izango dira, ibilbide luzeko proiektuak baitira, esaterako, laborategiak edota egoitza bekak. Beste batzuk, "El Respiradero" eta "Galeriak" programak kasu, urriko lehenengo asteburuan izango dira. Horrez gain, Getxoarte ez da leku batean bakarrik kokatuko eta beste leku eta giro batzuetan egingo da. Horrela, bere programa zabalduko da eta, horri esker, herritarrei sormen garaikidea gerturatuko die ezberdinak diren bost lan lerroz baliatuta.
Lehen lan lerroa bitartekaritza programa da, bertoko kolektiboei zuzendutako sormenerako eta trebakuntzarako gunea, eta horretarako, adibidez, laborategiak abian jarriko dira. Azken horiek zenbait asteko iraupena dute eta sinergiak bilatzen dituzte hainbat lekutan. Jubil*Arte espazioa (Romo Kultur Etxean) gehitu behar zaie horiei, zahartze aktiboaren aldeko apustua egiten duena, betiere erabiltzaileen jakintza eta praktikak kontuan hartuta. Azkenik, Artaza Romo BHIrekin elkarlanean sortu zen #Extraescolar lantaldeak aurrera darrai, laugarren urtez jarraian, ikerkuntza irekiaren formatua mantenduta.
Bigarren lan lerroa programa eszenikoa da. Gorputz adierazpenaren ulermena sustatu eta sormenari lotutako zenbait prozesuei buruzko gogoeta egin nahi du. Testuinguru honetan kokatzen da "El Respiradero" ekimena, artista garaikideen lana kalera (Areetako Geltokia plazan) gerturatu nahi duena eta izen handiko sortzaileak bilduko dituena. Horren barruan bost beka eskainiko dira, urriaren 6an eta 7an ikusgai izango diren proposamen eszeniko perfomatiboak bultzatzeko. Bekak eskatzeko deialdia uztailaren 6ra zabalik egongo da.
Hirugarrenik, egoitza programa bat ere abian jarri nahi dute antolatzaileek. Horri lotuta, Musika Eskolarekin elkarlanean proiektu eszenikoa garatzeko Proszenia beka dago, baita dantza eta antzerki garaikidearen sorkuntza ardatz duen egoitza programa ere.
ERAKUSKETA
Halaber, erakusketa programa ere izango da aurten. Horren bitartez, Getxoarte beste leku batzuetara zabalduko da, esaterako Torrene Aretora, komisarioen lana baldintza profesionaletan garatzeko aukera emanez. Paco Chanivet Getxoarte Bildumaren sariaren irabazlea izango da bertan lanak erakutsiko dituen lehenengo artista.
Horrez gain, "Galeriak" erakusketa-komisariotza proiektua izango da urriaren 5etik 30era, ohikoak ez diren espazioak bultzatzeko asmoz, Punta Begoñako Galeriak, hain zuzen ere. Programa horren barruan ere aipatzekoa da "Salón" beken deialdia. Horren bitartez, Romoko Kultur Etxean ikusgai izango diren hamar proiektu hautatuko dira, "Lazada" espazioarekin batera.
Azken hori topaketa programaren barruan dago. Komisario jarduera kritikoari buruzko topagunea da eta zenbait tailer eta mahai inguruak hartuko ditu. Bekak eskatzeko epea ekainaren 21etik uztailaren 21era egongo da zabalik.
