GASTEIZ, 24 (EUROPA PRESS)
Gizon bat atxilotu zuten asteazkenean, Gasteizen, genero indarkeriako delitu baten egilea delakoan. Gizonak 092 telefonora deitu zuen eta Gasteizko Udaltzaingoari esan zion emazte ohia hil egingo zuela. Atxilotuak 46 urte ditu.
Gasteizko Udalak prentsa ohar bidez jakinarazi duenez, gertaera asteazken arratsaldeko 19.20 aldera izan zen. Ordu horretan, mozkortuta zegoen gizon batek 092 telefonora deitu zuen, eta, emazte ohia hil egingo zuela esan ondoren, eseki egin zuen.
Gizonak esandakoaren larritasuna kontuan hartuta, Gasteizko Udaltzaingoko Operazioen Koordinaziorako Zentralak gestioak egin zituen deia egin zuen gizonaren telefono zenbakia aurkitzeko, eta azkenean emazte ohiarekiko urruntze agindu bat zuela egiaztatu zuen.
Udaltzaingoak eta Ertzaintzak biktima babesteko dispositiboa koordinatu zuten, eta gizonarekin harremanetan jarri ziren. Gasteiz etorbideko taberna batean zegoen. Agenteak bertan zeudela, gizonak emazte ohiaren aurkako mehatxu gehiago egin zituen, eta agenteak ere mehatxatu eta iraindu zituen. Hori guztia zela eta, 46 urteko gizona atxilotu zuten.
