VIGO, 30 Sep. (EUROPA PRESS) -

Investigadores das tres universidades galegas e a Fundación Empresa Universidade Galega (FEUGA) participaron hoxe en Vigo nunha experiencia piloto sobre transferencia de coñecemento denominada 'technomeeting', na que tamén tomou parte a empresa do sector das enerxías renovables Capital Energy.

Segundo explicou hoxe o reitor vigués, Alberto Gago, "a dificultade da transferencia de de coñecementos reside en poder poñer en contacto dúas entidades tan distintas con dous ritmos tan diferentes" como son as empresas e a Universidade, ao tempo que recordou que as tres institucións galegas levan "inmersas" nesta actividade os últimos 10 anos.

Ademais, Gago recordou a importancia do sector das renovables para as tres universidades galegas, que constituíron recentemente o Centro Internacional de Eficiencia e Sostenibilidad Enerxética, Energylab. No caso de Vigo, o reitor destacou que se trata dun sector "estratéxico, por obriga e por devoción".

Pola súa banda, o director de Feuga, Javier López, destacou que este 'technomeeting' permitirá "achegar capacidades no ámbito da investigación ás empresas.

No encontro celebrado hoxe na Universidade de Vigo, a empresa Capital Energy presentou as súas liñas de traballo no campo das renovables así como as previsións das súas necesidades tecnolóxicas, centrándose nas súas actuacións presentes e futuras en Galicia.

A firma dedícase á promoción, construción, explotación e mantemento de parques eólicos mariños e terrestres, parques solares fotovoltaicos e termoeléctricos, plantas de biodiésel en terreos portuarios e plantas de biomasa. Concretamente, na comunidade galega, a súa actuación céntrase na enerxía procedente do mar e da biomasa.