O investimento por habitante nos concellos galegos baixa un 5% en 2016 ata 795 euros, fronte a 951 de media
SANTIAGO DE COMPOSTELA, 20 Jul. (EUROPA PRESS) -
O Consello de Contas alerta de que o envellecemento da poboación galega fai "cada vez máis necesario" que haxa investimento de "máis fondos" para a atención residencial a persoas maiores e dependentes, así como "mellorar as condicións nalgúns aspectos".
Así o advertiu o conselleiro maior, José Antonio Redondo, en declaracións aos xornalistas xusto despois de facer entrega ao presidente do Parlamento, Miguel Ángel Santalices, da memoria anual de Contas de 2017.
Xunto á memoria, o Consello presentou unha decena de informes de fiscalización, entre eles un relativo ao gasto en atención residencial a persoas maiores e dependentes.
Respecto diso, constatou que "é un problema grave" nunha sociedade "tan envellecida" e presenta "moitos retos", pois esta atención "vai supor un investimento nos próximos anos moi importante". "Nós o que facemos no informe é alertar sobre esta situación", subliñou.
A xuízo do responsable de Contas, este é "un aspecto esencial" hoxe en día, o coidado dos maiores, polo que chamou a "procurar en todo caso liquidar" aspectos que teñen marxe de melloría.
Neste sentido, expuxo que as condicións actuais e as situacións familiares fan "obrigatorio" que a atención residencial sexa "unha opción con moita dor para moitas familias", nun contexto no que, ata hai pouco, "aquilo de levar aos pais a unha residencia parecía como algo pois fóra da forma de pensar".
Por iso, o documento do Consello trata "os problemas fundamentais que hai no aspecto residencial, pero sempre sobre a base positiva de alertar de que cada vez vai ser máis necesario investir máis fondos e mellorar as condicións nalgúns aspectos que se pon en evidencia".
ENTIDADES LOCAIS
Sobre outro dos informes entregados, o relativo ás entidades locais, do total, o 95% remitiron as súas contas, un dato "potente" en opinión de Redondo, quen valorou así mesmo a "calidade extraordinaria" destes documentos, que supoñen un "traballo enorme".
Con todo, avisou de que "en xeral as respostas dos concellos empeoraron un pouquiño nos dous últimos exercicios" e tamén lamentou que "hai algún concello que ten notables dificultades", con "algún caso moi reticente" a colaborar.
En canto ao gasto por habitante nos municipios galegos, que se situou en 2016 en case 795 euros, un 5% menos que o ano anterior e por baixo da media estatal (951 euros), desexou "nun futuro" aproximarse ó promedio.
No entanto, precisou que a cifra galega, ao ser resultado de "aglutinar" as de grandes, medianos e pequenos concellos, "distorsiona moito".
O descenso responde a que "se vén dunha crise" e os consistorios atravesaron "moitas dificultades", así como ao feito de que, por exemplo, "unha das grandes cidades" ten o seu investimento "restrinxido" por circunstancias políticas "de formación de maiorías". "Esperemos que nun futuro vaia mellorando", resolveu o conselleiro maior de Contas.
