El Principáu declara l'alerta naranxa en Llaviana

El presidente del Principado de Asturias, Adrián Barbón.
EUROPA PRESS
Actualizado: viernes, 18 septiembre 2020 11:51

UVIÉU, 18 Sep. (EUROPA PRESS) -

El presidente del Principáu anunció esti vienres que la Conseyería de Salú declara la situación d'alerta naranxa en Llaviana. El conceyu rexistró esti xueves 7 casos nuevos y dende el 1 setiembre atropa 42 positivos, 32 por un brotu con orixe en dos adolescentes.

El xefe del executivu asturianu fixo un llamamientu a los adolescentes de Llaviana, d'ente 13 y 18 años, pa que faigan la PCR. Unes pruebes pa los residentes nesti conceyu, anque se va facer siguimientu de contactos estrechos de los positivos polo que podríen llegar a realizase tamién pruebes a población d'otros conceyos, énte la movilidá existente nes cuenques mineres.

L'alerta naranxa va traer, como yá asocedió cuando se declaró en cinco conceyos del Oriente --Cangas de Onín, Cabrales, Parres, RibeseYa y Llanes-- midíes restrictives n'actividaes y va valir de "toque d'atención" pa controlar la situación y evitar "pasos más contundentes como'l confinamientu perimetral", esplicó'l presidente.

Barbón mostróse seguro de que l'alerta va ser útil como lo foi nel Oriente y confía na participación de los llavianeses pa collaborar nes pruebes, de la que destacó la collaboración del Conceyu. Esti vienres van facese públicos el teléfonu y corréu de contactu pa inscribise y pidir cita.

"Confío dafechu nos mozos de Llaviana, conózcolos perbién", dixo recordando que foi alcalde y ye vecín del conceyu. "Nun tengo nenguna dulda de que van facer lo correcto", añadió, remarcando que cola so collaboración "non namás se protexen ellos, sinón tamién a les sos families".

Preguntáu pola influencia qu'esti brotu pueda tener nel empiezu del cursu escolar en Llaviana, el xefe del Executivu asturianu refirióse a la evaluación de los técnicos de Salú p'apuntar que nun hai evidencia de tresmisión comunitaria y nun s'espera que pueda implicar aplazamientos na vuelta a les aules.

Coles mesmes, aprovechó p'adelantar que'l so Gobiernu va refocizar la estructura alministrativa de la Dirección Xeneral de Salú Pública, pa potenciar el rastrexu y la vixilancia epidemiolóxica.

Amás, los 82 residentes del Centru Polivalente de Recursos que l'ERA tien en La Pola Llaviana tán confinaos dende'l miércoles pol positivu en COVID-19 d'una trabayadora.

Asturianu ofrecido por