VIENA, 11 Nov. (DPA/EP) -
El Partíu Popular (OeVP) d'Austria, la formación qu'encabeza el ex canciller Sebastian Kurz, va empecipiar negociaciones con Los Verdes pa formar un gobiernu de coalición, anque'l líder conservador yá almitió que nun va ser un camín cenciellu.
"Nun va ser fácil porque les posiciones de Los Verdes y del Partíu Popular son mui distintos", almitió Kurz énte los periodistes, depués d'anunciar l'empiezu formal del diálogu con quien 'a priori' yá sonaba como'l so sociu preferente pa tratar de volver al poder.
Kurz aboga por endurecer la política migratoria y favorecer a les empreses, mentes que la formación ecoloxista ye partidaria del multiculturalismu y d'adoptar midíes contra'l cambiu climáticu. El OeVP llogró nos comicios de setiembre'l 37 por cientu de los votos, mentes que la formación ecoloxista disparóse diez puntos, hasta'l 14 por cientu.
Austria entá intenta aparcar la crisis abierta en mayu, cuando la coalición ente l'OeVP y l'ultraderechista Partíu de la Llibertá (FPOe) saltó pel aire a golpe d'escándalos. L'entós vicecanciller, Heinz-Christian Strache, dimitió en saliendo a la lluz un vídeu nel que supuestamente ufiertaba un tratu de favor a un oligarca rusu.
