UVIÉU, 27 Ene. (EUROPA PRESS) -
El Comité d'Empresa d'Expal, fábrica de componentes metálicos pa munición militar de Trubia, refugó l'ERE presentáu pola empresa pa la totalidá de la plantiya.
Nuna nota de prensa, el Comité llamenta que, trés años depués de comunicar un alcuerdu col Ministeriu de Defensa pal empiezu d'actividá nos antiguos talleres de municiones de la Fábrica d'Armes de Trubia, la empresa comunicó al Comité d'Empresa la decisión d'empecipiar el xueves 30 de xineru les negociaciones pa un ERE d'estinción de tolos contratos y el cese d'actividá.
El Comité d'Empresa entiende qu'Expal "tien carga de trabayu abondo" pa poder buscar alternatives al zarru definitivu de les instalaciones de Trubia, teniendo en cuenta que'l centru d'Asturies "ye l'únicu con capacidá pa poder fabricar componentes metálicos como los que se tán fabricando na actualidá".
Por eso, el Comité d'Empresa esixó la retirada del ERE, la busca d'alternatives pa garantizar la continuidá de l'actividá industrial, y evitar la estinción de los 57 puestos de trabayu.
El Comité d'Empresa encamienta tamién al Ministeriu de Defensa a qu'esixa a Expal el cumplimientu del alcuerdu qu'implicaba una concesión d'esplotación de les instalaciones 10 años.
