UVIÉU, 13 Dic. (EUROPA PRESS) -
La conseyera d'Educación, Carmen Suárez, comprometióse esti vienres col presidente de l'Academia de la Llingua Asturiana (ALLA), Xosé Antón González Riaño, a que cuando haya en Madrid un Gobiernu operativu va demandar al ministru d'Educación futuru l'aprobación de la Especialidá d'Asturianu.
En declaraciones a Europa Press, el presidente de l'ALLA esplicó los temes que trató nel so alcuentru cola conseyera, de la que Riaño destacó que foi ún "de los más positivos que tuvo nos últimos tiempos con un políticu" y la so "sensibilidá" hacia la enseñanza del asturianu, llingua que, según esplicó Riaño, la conseyera faló con naturalidá a lo llargo del alcuentru.
Nesi sentíu, ente los temes trataos tuvo'l loxístico, no que tien que ver cola organización de la Universidá Asturiana de Branu (UABRA) na Escuela Hogar de Cangas del Narcea y les posibilidaes pa poder "acuriosar les instalaciones".
Otra manera, la conseyera comprometióse a promocionar la enseñanza del asturianu y la so importancia dientro de la mesma comunidá educativa porque "nestos momentos ufiértase la enseñanza, pero nun se promociona, que ye lo que diz la llexislación vixente", indicó'l presidente de l'ALLA.
Con too, ún de los puntos fundamentales foi la necesidá de l'aprobación de la especialidá docente pa los maestros d'asturianu. Riaño recordó qu'esta ye una reivindicación de la mesma Xunta Xeneral, de la Xunta de Personal Docente non Universitariu y del mesmu Conseyu Escolar del Estáu, el máximu órganu consultivu nacional.
Riaño esplicó que tanto Academia como Conseyería d'Educación comparten "el pasu a siguir" y Carmen Suárez comprometióse a que cuando hubiera un Gobiernu n'España y un ministru d'Educación que nun tuviera en funciones "va demandar el llogru d'esta especialidá" porque la conseyera "entiende perfectamente la so necesidá".
LA ESPECIALIDÁ
La creación de la especialidá docente ye una midida que los principales sindicatos educativos asturianos --CCOO, UXT, Suatea y CSI-- vienen reclamando, al afirmar que la so falta supón que los más de 400 profesores qu'imparten asturianu nun puen presentase a oposiciones, tener una plaza fixa o optar a un concursu de tresllaos.
Nel ámbitu políticu, tolos partíos asturianos apoyen esta midida o, polo menos, lleváronla en dalgún momentu nel so programa. Mesmamente, nel 2009, el PP foi'l que presentó na Xunta Xeneral una proposición non de llei pa la creación de la especialidá docente d'asturianu.
El Parllamentu asturianu aprobó nos últimos años delles resoluciones pa que dende Madrid punxeren en marcha esta midida, anque'l PP suel votar en contra. Nel 2014, l'apoyu a la creación de la especialidá sumó a PSOE, IX, Foru Asturies y UPyD, daquella con un diputáu nel Parllamentu asturianu, Ignacio Prendes, güei portavoz de Ciudadanos n'Asturies y ex diputáu de Ciudadanos en Madrid.
