UVIÉU, 18 Oct. (EUROPA PRESS) -
El Rei Felipe VI va pronunciar esti vienres el so primer discursu nun actu públicu depués de que se publicara la sentencia del Tribunal Supremu qu'impón penes de cárcel por delitos de sedición y malversación a los líderes del procesu independentista en Cataluña.
Va ser na ceremonia de los Premios Princesa d'Asturies, ún de los dos momentos del añu nos que'l Rei fai una intervención con un tastu más personal --l'otru ye'l mensaxe de Navidá de la nueche del 24 d'avientu--.
Desque'l Supremu publicó la so sentencia'l llunes pasáu, el Palaciu de la Zarzuela guardó silenciu y nun hubo nengún eventu nel que'l xefe d'Estáu tuviera una intervención pública.
El Rei sí va facer esti vienres el so tradicional discursu nel Teatru Campoamor d'Uviéu, nuna ceremonia a la que, pela primer vez, los Reis van asistir xunto les sos fíes, y na que tamién va haber unes palabres --el so primer discursu en públicu-- de la Princesa d'Asturies.
EN 2017, POCU DEPUÉS DEL 1-O
El discursu del Rei na ceremonia ye siempre un emponderamientu de los premiaos, pero n'ediciones pasaes incluyó alusiones a asuntos institucionales d'importancia. En 2017, malapenes trés selmanes depués del referéndum del 1-O, el xefe d'Estáu afirmaba nesi foru qu'España "tien que facer frente a un inaceptable intentu de secesión nuna parte del so territoriu nacional".
"Va resolvese al traviés de les sos llexítimes instituciones democrátiques, dientro del respetu a la nuestra Constitución y ateniéndose a los valores y principios de la democracia parllamentaria", añadía.
Nesa ocasión el Premiu a la Concordia recibiéronlu les instituciones europees y el Rei estimó la presencia de los sos presidentes n'Uviéu como símbolu "del compromisu, l'apoyu y la solidaridá de les instituciones europees con España", el so sistema constitucional y el so Estáu Social y Democráticu de Derechu.
Too eso depués del so discursu del 3 d'ochobre de 2017, nel que'l Rei, al que la Constitución define como "símbolu de la unidá y permanencia" del Estáu, afirmó que los poderes del Estáu tienen la responsabilidá de "asegurar l'orde constitucional "énte los que pretendieron "quebrar la unidá d'España y la soberanía nacional, que ye'l derechu de tolos españoles a decidir democráticamente la so vida a comuña".
En 2019, la ceremonia de los Premios Princesa d'Asturies coincide con una convocatoria de fuelga en Cataluña de los sindicatos independentistes, depués de cuatro díes de protestes pola sentencia.
EN 2018, L'ANIVERSARIU DE LA CONSTITUCIÓN
En 2018, na víspora del 40 aniversariu de la Constitución, el Rei rindió homenaxe a la Carta Magna como "frutu de la concordia ente españoles, xuníos por un deséu fondu de reconciliación y de paz, xuníos pola firme voluntá de vivir en democracia".
"Una Constitución que recuperó pal pueblu español la soberanía nacional y que devolvió a los españoles la so llibertá y la so condición de ciudadanos; que reconoció tamién la diversidá de los sos oríxenes, cultures, llingües y territorios", proclamó.
