UVIÉU, 15 Nov. (EUROPA PRESS) -
El grupu Felpeyu mostró'l so malestar pol homenaxe que'l Conceyu d'Uviéu ufrió al músicu Elías García, que finó'l 14 de setiembre pasáu. Pal integrante de la formación Ruma Barbero ye un homenaxe "falsu y baleru" que "nun respeta la so obra".
En declaraciones a Europa Press, el músicu posicionóse sobre l'alcordanza a Elías García --miembru de grupos como Felpeyu, Llan de Cubel o Tuenda-- qu'aparez nel programa de la segunda xornada del Concursu y Muestra de Folclore Ciudá d'Uviéu, que se va celebrar esti domingu 17 de payares nel Filarmónica.
Nesa alcordanza, fecha pol musicólogu Félix Martín, ta la lletra del cantar 'Tierra', ún de los más conocíos del grupu Felpeyu, traducida del orixinal asturianu al castellanu. Pa Ruma esto supón ufrir un homenaxe "falsu y baleru". "Si quieren homenaxar a Elías que respeten la so obra", indicó'l músicu.
Pa Barbero, si dende'l Conceyu d'Uviéu camienten que nun se va entender esa lletra n'asturianu o quieren llegar al públicu castellanofalante "que pongan l'orixinal y al llau la traducción". "Si quieren siguir insultando la memoria d'Elías y a Felpeyu que sigan asina", sentenció l'integrante del grupu de folk.
