Piden amás que se faiga lo mesmo col gallego-asturianu
UVIÉU, 5 Dic. (EUROPA PRESS) -
L'Academia de la Llingua Asturiana (ALLA) felicitó a la
Conseyería de Cultura pol proyectu de Decretu nel que s'afiten los niveles de competencia nel usu de la llingua asturiana. Nesi sentíu, piden que nun s'allarguen muncho nel tiempu "y que se pueda acreitar el so nivel de competencia n'asturianu con calter oficial".
Según señaló la institución al traviés de nota de prensa, esti miércoles mandaron una felicitación al director xeneral de Planificación Llingüística y Normalización del Gobiernu d'Asturies, Fernando Padilla Palicio, pol proyectu de Decretu.
Con él, l'asturianu va tener cinco niveles de competencia adaptaos al Marcu Común Européu de Referencies de Llingües. Estos niveles van ser el básicu A1, básicu A2, intermediu B1, intermediu B2 y avanzáu C1. En caún va haber una prueba de certificación qu'acreite'l nivel de comprensión y espresión oral y escrita en llingua asturiana.
Por eso, l'Academia espera que los trámites previos "nun s'allarguen nel tiempu y que'l Decretu vea la lluz bien llueu, de mou que los asturianos y asturianes a los que-yos pruya puedan acreitar el so nivel de competencia n'asturianu con calter oficial".
GALLEGO-ASTURIANU
Del mesmu mou, la institución llingüística pide a la Conseyería de qu'estudie la posibilidá de que s'entame'l trabayu que lleve a fixar los niveles llingüísticos del gallego-asturianu.
"Ello sedría especialmente importante pa la dignificación de la llingua eonaviega y pa da-y valir al so conocimientu ente los ciudadanos asturianos del Navia-Eo", un llabor pal qu'ufren l'apoyu de la Secretaría Llingüística del Navia-Eo de l'Academia.