UVIÉU, 14 Oct. (EUROPA PRESS) -
L'Academia de la Llingua Asturiana (ALLA) va celebrar ente'l 5 y 7 de payares les XXXVIII Xornaes Internacionales d'Estudiu na Facultá de Filosofía y Lletres de la Universidá d'Uviéu, qu'inclúin ocho ponencies d'espertos internacionales.
Les Xornaes empiecen el 5 de mayu a les 12.00 hores, cola inauguración oficial, pa depués dar pasu a la presentación de los númberos nuevos de les revistes 'Lletres Asturianes' y 'Ciencies. Cartafueyos Asturianos de Ciencia y Teunoloxía', que publica l'ALLA.
Yá a les 13.00 hores, el director de cine Ramón Lluis Bande va ufiertar la ponencia sobre'l cine asturianu. Nesa mesma xornada, el profesor de la Universidá de Zamora, Philipp Obrist, va falar sobre'l mitu de les llingües medievales y la contra argumentación n'asturllionés y la profesora de la Universidá d'Uviéu, María Olga Álvarez Huerta, va analizar la primer traducción del llatín al asturianu.
Nesa mesma xornada tamién va haber comunicaciones sobre Amigos del Bable, la toponimia d'Asturies en llingua de signos, la enseñanza virtual del asturianu y la historia del himnu d'Asturies.
Yá'l miércoles, el profesor de la Universidá de la Florida Imanol Suárez Palma va falar sobre la 'posesión inalienable nes construcciones medies del castellanu y l'asturianu', mentes que la profesora de la Universidá de La Laguna Josefa Dorta Luis va tratar les rellaciones ente l'asturianu y el dialectu canariu.
P'acabar les potencies d'esta xornada, el profesor de la Universidá de Torino Antonio Romano va falar de la prosodia asturiana, un tema que va ocupar delles comunicaciones nesa xornada.
El xueves, la profesora de la Universidá de Toulouse, Lucia Molino, va tratar de los préstamos n'asturianu, mentes que'l profesor de la Universidá de Barcelona, José Enrique Gargallo Gil, va falar de los refranes meteorolóxicos. Nesa última xornada tamién se va falar de la imaxe social del asturianu, la lliteratura oral de Senabria y la documentación nel Hospiciu d'Uviéu.
