UVIÉU, 19 Jul. (EUROPA PRESS) -
El secretariu xeneral de Podemos Asturies y diputáu autonómicu, Daniel Ripa, reclamó xuntuoJuan Carlos Lora, representante de CCOO en Renfe, inversión na rede de cercaníes ferroviaries pa ufiertar un serviciu de calidá n'Asturies.
El parllamentariu refirióse a retrasos en frecuencies ensin información a los usuarios, al deficitariu caltenimientu de trenes y trazaos, a la falta de personal o a l'ausencia de doble vía y catenaries pa esixir al Ministeriu de Fomentu la inversión necesario pa ufiertar un serviciu bonu a los asturianos y recuperar los usuarios perdíos que, diz, pasaron de 14.000 a pocu más de 4.000 nos últimos años.
"En Madrid o Barcelona nun se consentiría", sostién Ripa, que calificó la situación de "inalmitible", reclamando al Executivu asturianu ser más esixente col Estáu pa correxir la discriminación" de la comunidá y impulsar un compromisu públicu en defensa de les cercaníes.
Igualmente, el dirixente de Podemos repitió la so propuesta de tresferencia de competencies al Principáu de la xestión de les cercaníes una vez se ponga al día la rede.
Per otru llau, Juan Carlos Lora alvirtió de que'l problema de xestión nun anicia na dirección asturiana de la compañía pública de tresporte sinón del Ministeriu, polo que pide una apueste claro del Gobiernu central pol ferrocarril nel Principáu.
Ente les midíes que considera que tendríen qu'impulsase, amás del caltenimientu de les infraestructures y los trenes o'l refuerciu de la plantiya, señaló la necesidá d'ufiertar información a los usuarios, especialmente nes llinies de l'antigua FEVE, sobre los cambeos o supresiones d'horarios; o afacer les frecuencies a les necesidaes de los usuarios.
Pal ferrocarril, asegura, el competidor nun ye l'autobús sinón el coche particular. D'esta manera, encamienta a impulsar la conexón intermodal, ufiertar precios competitivos y potenciar les llinies con más demanda pa favorecer l'usu d'un mediu de tresporte públicu y sostenible.
