Podemos propón abrir yá'l debate sobre l'Estatutu pa presentar una propuesta de reforma'l 25 de mayu del 2021

Daniel Ripa.
EUROPA PRESS.
Publicado: viernes, 18 septiembre 2020 13:19

UVIÉU, 18 Sep. (EUROPA PRESS) -

Podemos Asturies unvió esti vienres a tolos grupos parllamentarios --menos a Vox-- una propuesta pa entamar los trabayos qu'acaben na reforma del Estatutu d'Autonomía. Asina, proponen presentar una propuesta de reforma'l 25 de Mayu de 2021, día en que la Xunta Xeneral declaró la so soberanía en 1808.

Nesi sentíu, propunxeron constituyir un grupu de trabayu nel parllamentu qu'a lo llargo del últimu trimestre de 2020 analice les posibles mayoríes en trés bloques: autogobiernu --les competencies nueves que podría asumir Asturies--, derechos sociales --con cuestiones como'l blindaxe del salariu social nel Estatutu-- y la oficialidá del asturianu y del gallego-asturianu.

Una vez analizaes les posibles mayoríes parllamentaries, nel siguiente períodu de sesiones ellaboraríase un dictame de reforma del Estatutu pa entamar el procesu'l 25 de Mayu de 2021 y incluyir, a partir d'entós, la participación de la ciudadanía y de los axentes sociales.

Asina lo esplicó n'Uviéu'l secretariu xeneral de Podemos Asturies, Daniel Ripa, que señaló que nun mandaron la propuesta a Vox porque "nun tán a favor de l'autonomía asturiana".

Coles mesmes, destacó la necesidá d'abrir la reforma nestos momentos. "Dexalo sería irresponsable", afirmó, p'añadir que'l momentu actual de crisis sanitaria "obliga a reconstruyir Asturies" y a dotase de ferramientes "pa tener más control y capacidá p'autoxestionanos".

Ripa recordó que'l Principáu recibió dende 1979 un total de 105 tresferencies del Estáu, "mui perbaxo de les 189 de Cataluña, les 155 d'Andalucía, les 144 de Galicia o les 127 de Canaries, y namás llixeramente perriba de les 99 d'Estremadura o les 93 de Castiella-La Mancha".

Per otru llau, sobre'l tema de la oficialidá del asturianu y del gallego-asturianu, indicó que la falta d'esti marcu llegal supón "una anomalía que namás refuercia a la ultraderecha qu'utiliza'l parllamentu pa facer el show". Asina, esplicó que'l restu de fuercies usen l'asturianu de forma natural y punxo d'exemplu que nel últimu plenu PP y Ciudadanos presentaron enmiendes en gallego-asturianu a una PNL de Podemos redactada nesta llingua.

Por eso, resaltó qu'existen "blimes" pa llegar a alcuerdos "múltiples y plurales" con tolos partíos y que, con too, p'almitir a tramite la propuesta de reforma faen falta 23 diputaos, cifra que yá superaríen ente PSOE, Podemos y IX.

Amás, preguntáu concretamente pol votu favorables del PSOE o Foru a la oficialidá nesta llexislatura, Ripa mostróse convencíu de qu'existe una mayoría pa sacala alantre. "Toi convencíu de que'l día de la votación va haber mayoría p'aprobar la oficialidá, pero pa eso hai qu'entamar el procesu y dialogar muncho pa buscar consensos", sentenció.

Asturianu ofrecido por