PSOE y IX firmen un prealcuerdu de Gobiernu onde s'inclúi la puesta en marcha d'un Plan de Normalización del Asturianu

Imagen de la firma del documento.
AYUNTAMIENTO.
Publicado: jueves, 18 julio 2019 10:02

Martín va pasar a ser conceyal de Mediu Ambiente y Movilidá

UVIÉU, 18 Jul. (EUROPA PRESS) -

L'alcaldesa de Xixón, la socialista Ana González, y el conceyal de IX Aurelio Martín firmaron un prealcuerdu de gobiernu qu'inclúi 88 midíes. Ente elles la promoción del asturianu na vida política, económica, social y cultural del conceyu, potenciar la Oficina de Normalización y poner en marcha un Plan de Normalización nuevu.

Otra manera, Aurelio Martín va pasar a formar parte de la Xunta de Gobiernu como responsable del área de Mediu Ambiente y Movilidá.

Trátase d'un prealcuerdu que dambes formaciones van someter a les sos respectives bases el vienres 26 de xunetu, según anunciaron González y Martín esti miércoles nuna rueda de prensa onde los dos utilizaron esti alcuerdu como metáfora de la cultura de pactos ente la esquierda, nuna clara alusión a la situación estatal.

Los dos tamién apostaron por abrir l'alcuerdu nun futuru a Xixón sí Puede, la marca local de Podemos. Asina, l'alcaldesa señaló que'l diálogu cola formación morada quedó paralizáu porque "tán nun procesu internu". "Vamos negociar nun futuru en base a esi documentu, que son les midíes prioritaries y el puntu de partida pa cualquier negociación", señaló.

Per otru llau, Martín abogó tamién por ampliar "la base social de la esquierda", pero respetando siempre'l documentu qu'acababen de firmar.

88 MIDÍES

L'alcuerdu, que con too van tener que ratificalu les bases de les dos formaciones, inclúi 88 midíes dixebraes n'Educación, Memoria Histórica, Cultura, Infancia y Mocedá, Economía y Empléu, Servicios Sociales, Deporte, Igualdá, Mediu Ambiente y Participación Ciudadana.

Nel documentu recuéyense midíes como l'ampliación de les places d'Infantil hasta doblar les existentes y la estensión del serviciu de comedor escolar a los institutos.

Tamién s'alcordó recuperar y abrir el refuxu antiaéreu de Cimavilla como Aula de la memoria y ellaborar un Plan Estratéxicu de Cultura, un Plan d'Infancia y un Plan de Normalización del Asturianu, amás de rematar les obres de Tabacalera y definir el so usu y xestión.

El documentu establez la participación ciudadana na xestión de les polítiques culturales o de mocedá al traviés d'órganos de consulta y el reforciamientu de los Centros Municipales y los Conseyos de Distritu.

Per otru llau, van poner en marcha parques empresariales nuevos nos terrenos de Naval Xixón y Mina La Camocha, amás de l'ampliación del Parque Científicu y Tecnolóxicu y la gratuidá del autobús urbanu pa los menores de 16 años.

Recoyer nel alcuerdu la implantación del IBI diferenciáu, la ellaboración d'un censu de viviendes vacíes, la rexeneración del cascu urbanu y la ellaboración d'un Plan de Movilidá con vistes a la puesta en marcha del Área Metropolitana Asturiana.

Coles mesmes, vanse a promover delles polítiques pa convertir a Xixón nuna ciudá inclusiva, contra'l sexismu y a favor del colectivu LGTB. Amás, vase ellaborar un Reglamentu de Llaicidá y un protocolu contra la contaminación.

Tamién un plan de xestión de borrafes, va modernizase EMTUSA pa que los vehículos sían eléctricos y va convertise la redolada del Picu Corros nun pulmón verde pa la ciudá.

Asturianu ofrecido por