UVIÉU, 16 Oct. (EUROPA PRESS) -
El colectivu 'Marches de la Dignidá' entama, un añu más, una serie d'actividaes reivindicatives n'Asturies coincidiendo cola entrega de los Premios Princesa d'Asturies. Ente les actividaes, ta incluyida un pasucais esti vienres día 19 d'ochobre dende'l Conceyu d'Uviéu a la Plaza de la Escandalera, a unos metros del Teatru Campoamor, onde se va celebrar la ceremonia d'entrega de los Premios presidida por Felipe VI.
'Fuera monarquía franquista. Valió de corrupción y represión', ye'l lema de la concentración. En declaraciones a los medios de comunicación esti martes, la portavoz de 'Marches de la Dignigá', Silvia Salamanca, xustificó la protesta contra los Premios y contra la Monarquía, a la que definió como "institución franquista".
Dixo que s'oponen a "llavar la cara" de dalgo que s'apoya nel "réxime caduco y corrupto de 1978". En criticando al Rei por xubir los sos retribuciones anguaño, dixo que la Fundación Princesa d'Asturies recibe tamién perres públiques del Gobiernu central, el Parllamentu asturianu o'l Gobiernu del Principáu.
"Asturies nun ta pa fiestes nin p'alfombres bermeyes: la nuestra mocedá ta condenada al exiliu llaboral, medra la probeza infantil, medra la probeza nos nuestros mayores, sigue l'esmantelamientu y los nuestros servicios públicos cada vez son más precarios", llamentó.
La movilización va principiar a les 14.00 hores na Plaza del Conceyu d'Uviéu, onde los organizadores van realizar una comida popular. Salamanca dixo que van venir participantes de delles comunidaes autónomes a protestar. Asina, anunció la presencia de colectivos de Madrid, Galicia y Cataluña.
