MADRID, 21 May. (EUROPA PRESS) -
El presidente del Gobiernu en funciones y líder del PSOE, Pedro Sánchez, fixó esti martes, día en que se constitúin les Cortes Xenerales, los asuntos prioritarios nos que quier algamar alcuerdos col restu de formaciones na llexislatura qu'entama.
Un pactu educativu nuevu que deroge la LOMCE; un Estatutu nuevu de los Trabayadores que revise la reforma llaboral del PP; la revalorización y la sostenibilidá de les pensiones públiques; la transición hacia un modelu económicu más sostenible col mediu ambiente; la llucha contra la violencia de xéneru; l'accesu a la vivienda de los mozos; la reconocencia de derechos nuevos como la eutanasia y la muerte digna, tán ente los puntos mentaos pol presidente.
Sánchez intervieno nuna xunta previa al Plenu de constitución de les Cortes colos diputaos nuevos y senadores socialistes escoyíos nes elecciones xenerales del 28 d'abril y a los que pidió impulsar dende'l Parllamentu toos estos alcuerdos.
En materia territorial, afitó como prioridá defender l'Estáu autonómicu frente a l'ambición de los separatistes pero tamién frente a les voces qu'abogen por recentralizar competencies. Sánchez mostróse partidariu d'anovar nesta llexislatura'l sistema de financiación autonómica y local y tratar midíes contra la despoblación de la España interior y rural.
