MADRID, 14 Ago. (EUROPA PRESS) -
El Ministeriu de Sanidá alcordó esti vienres coles comunidaes autónomes "por unanimidá" que se prohiba fumar na vía pública o al aire llibre (tanto pitos como cualesquier otru dispositivu d'inhalación de tabacu) si nun haia dos metros de distancia de seguridá, como aprobaron Galicia o Canaries, como midida de prevención énte'l COVID-19. Coles mesmes, tamién se fixó'l pieslle de toles discoteques, sales de baille y chigres con y ensin actuaciones en directu.
Asina lo anunció'l ministru de Sanidá, Salvador Illa, esti vienres en rueda de prensa depués d'una xunta estraordinaria coles comunidaes autónomes, nel marcu del Conseyu Interritorial del Sistema Nacional de Salú (CISNS), pa tratar la evolución del andanciu del coronavirus.
Igualmente, n'hostelería, restauración, terraces y chigres va tener qu'haber un metro y mediu de distancia ente meses, con 10 persones a lo más por grupu. Esta distancia tamién se va tener que respetar nes barres. La mesa o agrupación de meses que s'utilicen pa los grupos, amás, va tener que ser d'alcuerdu col númberu de persones pa respetar la distancia mínima interpersonal.
Estos establecimientos van tener la so hora de zarru a la 1 de la madrugada y nun va poder almitise a nuevos veceros dende les 12. Xunto con estes midíes, de forma complementaria alcordóse reforciar los controles pa evitar el consumu d'alcohol en vía pública que nun tea autorizao, teniendo en cuenta que les comunidaes autónomes y conceyos van aplicar les sanciones correspondientes.
