AVILÉS, 16 Oct. (EUROPA PRESS) -
La XVI edición de la Seronda d'Avilés estrena allugamientu anguaño, porque va celebrase na Plaza de Les Aceñes los vienres 26 y sábadu 27 d'ochobre próximos.
Esti eventu presentólu esti martes nel Conceyu d'Avilés la conceyala de cultura, Yolanda Alonso, y los representantes de la Federación Xuntanza d'Avilés, José Federico Álvarez, José María Villaboy y Marisa Luque, y la representante de la Estaya de la Llingua d'Avilés, Montserrat Machicado.
Amás del cambiu d'allugamientu, de la Plaza Alvarez Acebal a la Plaza de Les Aceñes, esta edición llega con más novedaes. La organización realizó un especial refuerciu de les actividaes pa neños con 'La Reciella na Seronda'.
La música va ser protagonismu y el vienres va estrenase sesión vermú cola banda 'Los Gascones' a les 13.00 hores, que van repitir el sábadu a la mesma hora. El folk, la música de gaita, y el baille y la danza tradicional tamién van tar presentes.
La nueche del vienres va ser pal baille, cola 'Nueche en Danza', dende les 22.30 hores, y la del sábadu, a la música, con 'A mover la patuca' dende les 22.00 hores, coles actuaciones de 'Serendén' y 'El Koku la mazana'.
El programa infantil inclúi talleres creativos, como 'Fai la to chapa'; 'Colorea y diseña la to obra'; 'Recicla cola seronda'; y 'Crea la to mascota'; tamién xuegos populares, como rana, cuerda, carrera de panoyes o pesca de la botella. Amás, los artistes asturianos Olga Cuervo y David Varela van encargase de l'animación, dende les 11 hores.
Na plaza van asitiase tamién puestos del Mercáu Ecolóxicu y Artesanu, con maestros artesanos trabayando en vivu. Nun va faltar el sábadu la 'Xinta popular' a un preciu de 5 euros con pote de berces y arroz con lleche, dende les 14.30 hores.
P'acabar, otra de les novedaes, na tarde del sábadu, va ser dexar espaciu pal teatru costumista asturianu, en ¡A escena!, cola actuación del Grupu Garrapiellu, de Piarnu, a les 18.30 hores. Van poner sobre les tables la obra 'La criada de tayuela'.
