Diz qu'a pesar de plataformes como Neflix, va siguir habiendo públicu que prefiera esperimentar el cine "tando xuntos"
UVIÉU, 17 Oct. (EUROPA PRESS) -
El cineasta italoamericanu Martin Scorsese, Premio Princesa d'Asturies de les Artes, afirmó esti miércoles que si la política migratoria de Donald Trump tuviera vixente en 1909, él "nun taría equí".
En rueda de prensa, el gallardonáu, d'ascendencia italiana, criticó la política contra la emigración llatina a EEUU y recordó qu'a esti país "creáronlo los inmigrantes". "Lo que ta pasando ye murnio y tráxico", señaló, p'añadir qu'esto "va contra la idea básica de lo que ye EEUU".
Scorsese recordó que yá hubo vetos migratorios n'otres dómines, mesmo contra los italianos y apuntó que la emigración ye una "esperiencia" por suponer munches llingües y relixones "viviendo xuntes". "El sentimientu de división ye bien tráxicu, espero qu'esto pase ceo", indicó.
Esi ye una tema que'l cineasta trató na so película 'Gangs of New York', onde los emigrantes irlandeses son refugaos pola so relixón católica. Precisamente, Scorsese mentó que'l se crió viendo películes de gánster de los años cuarenta y cincuenta que representaben "un mundu que yo conocía".
Nacíu en Queens y criáu en Little Italy, en Manhattan, a Scorsese influyólu'l cine negru y criase xugando nes cais "mentes había bandes alredor". Una sociedá formada por emigrantes onde la relixón católica "formo parte de lo que viví y de lo que soi".
EL FUTURU DEL CINE
El cineasta, que definió a Robert De Niro como'l so "meyor collaborador" y una persona cola que tien telepatía porque ye "l'únicu que me conoz", defendió la pervivencia del visionáu de llargumetraxes en sales y con públicu "enantes de llegar a les cases".
Scorsese, que va estrenar en 2019 'The Irishman', distribuyida por Neflix, afirmó qu'esta plataforma o otres similares como Amazon son "clave" nestos momentos pa consiguir financiación y que supunxeron que "los nuestros fíos vivan una esperiencia cinematográfica distinta".
Sicasí, punxo d'exemplu como sigue habiendo xente a la que-y presta dir a un restaurante anque agora pues pidir comida a casa, polo que señaló que "la imaxe en movimientu va siguir tando ehí y va siguir habiendo persones que quieran esperimentar el cine tando xuntos".
"El cine del que yo vengo precisa vese con públicu", indicó, p'abogar por que les películes de Neflix puedan vese enantes nes sales. Nesi sentíu, Scorsese indicó que la industria cinematográfica nestos momentos vive una "revolución estraordinaria". "Tamos nuna fase nueva y nun sabemos a onde vamos a dirixinos", indicó.
