"¿Nun van dicir nada dende les direcciones de la FSA, Podemos y IX sobre lo que quieren facer los sos partíos en Valdés?", pregúntense
UVIÉU, 19 Sep. (EUROPA PRESS) -
La Xunta pola Defensa de la Llingua Asturiana (XDLA) refugó la decisión de los grupos municipales del Conceyu de Valdés -PSOE, Cs, PP, Avanza Valdés y Foru- de llevar al Plenu una moción pa que tola toponimia del conceyu caltenga la forma "acastellanada y deturpada" al llau de la forma tradicional. Trátase según la organización d'un "ataque a la llegalidá y al patrimoniu asturianu"
Al traviés de nota de prensa, la XDLA recordó que la toponimia tradicional de Valdés ye oficial dende 2014 porque'l Conceyu la aprobó primero, "pasu necesariu pa que'l Gobiernu la oficializara depués". "Nestos cincos años, les Alministraciones públiques nun usaron nunca esa toponimia nin comunicaron al INE los cambios, incumpliendo asina la llexislación vixente", diz l'asociación.
Nesi sentíu, la XDLA criticó a PSOE, Podemos y IX --qu'en Valdés van xuntos baxu'l paragües d'Avanza Valdés-- por apoyar la oficialidá a nivel autonómicu y, al empar, afalar esta iniciativa nesti conceyu. Recuerden amás que'l pactu d'investidura firmáu por PSOE y IX y que fixo a Adrián Barbón presidente falaba d'aprobar una llei pa impulsar l'usu de la toponimia asturiana. "¿Nun van dicir nada dende les direcciones de la FSA, Podemos Asturies y IX sobre lo que quieren facer los sos partíos en Valdés?", pregúntase la XDLA.
Con too, tamién critiquen la defensa que faen dende los partíos de derechos de la denominación doble asturianu/castellanu cuando "n'Uviéu existe la doble denominación y dende'l Conceyu nunca usen la forma tradicional". Una situación que ven como un "complexu d'inferioridá" y "cosmopaletismu".
Por eso, soliciten al Principáu y a Cultura que nun dean "nengún pasu atrás col procesu de recuperación de los nomes tradicionales de los llugares d'Asturies". "Ye'l momentu de mostrar l'apoyu al trabayu de la Xunta de Toponimia, basáu nel llabor d'espertos y que cuntó col consensu de toles fuercies polítiques de Valdés, eses qu'agora se desdicen de lo qu'aprobaron va cinco años", sentenciaron.
