XIXÓN, 18 Ene. (EUROPA PRESS) -
Soledad Saavedra, la vilba del ex presidente del Principáu, Vicente Álvarez Areces, quixo agradecer esti vienres les muestres d'apoyu y ciñu recibíes pola muerte del so home. "Yera un xixonés de corazón y un asturianu de vocación", resaltó.
Asina lo indicó, visiblemente afectada, en declaraciones a los medios de comunicación dende'l veloriu instaláu nel Salón de Recepciones del Conceyu de Xixón, ciudá de la qu'Areces foi tamién alcalde 12 años.
"Tola vida ufrióla a lluchar pola so tierra", destacó, a lo qu'apuntó qu'agora Asturies da la despidida. "Nun tengo más que palabres d'agradecimientu", apuntó por toles persones que diz que la tán llamando dende toa España en señal de despidida. Coles mesmes, agradeció tanto de persones de tolos partíos políticos como de la cai que foron a manifestar el "ciñu y respetu" hacia Areces.
Saavedra faló asina depués de que foren munches les persones les que s'averaren hasta'l Conceyu, onde sobre les 12.00 hores quedó instalada'l veloriu.
Xunto al féretru, cubiertu poles banderes d'España, Asturies y Xixón, taba la so vilba, amás de los dos hermanos d'Areces, Miguel y Nieves, los sos fíos Alberto y Manuel, la so nieta y el so cuñáu Pin Torre Arca.
Al so llau, taba l'alcaldesa de Xixón, Carmen Moriyón, y miembros de la Corporación, mentes qu'al otru llau del féretru taba'l portavoz del PSOE nel Senáu, Ander Gil, el conseyeru d'Infraestructures, Fernando Lastra, la vicesecretaria del PSOE, Adriana Lastra, el secretariu xeneral de la FSA, Adrián Barbón, la ex alcaldesa xixonesa, Paz Fernández Felgueroso, y el portavoz del Grupu Municipal Socialista, José María Pérez, amás d'otros conceyales y representantes de la sociedá civil.
Pel veloriu pasaron numberoses persones, munches d'elles anónimes, que quixeron dar l'últimu adiós al ex presidente rexonal, pero tamién delles personalidaes del ámbitu políticu, social y civil.
