XIXÓN, 9 de Xunu (EUROPA PRESS)
La multinacional Tenneco Automotive treslladó esti llunes al Comité d'Empresa que taría dispuesta a axustar la dimensión de la plantiya con un tope máximu de 129 trabayadores, amás d'ofrecer indemnizaciones pa los emplegaos qu'acepten tresllada-y a otres plantes d'España y Alemaña.
Asina lo indicó a Europa Press el presidente del Comité d'Empresa, Isaac Piñera, tres la xunta caltenida na sede del Idepa con responsables de la multinacional. Lo que nun llegó a concretase tovía ye'l númberu d'amortiguadores que podría llegar a facer la planta xixonesa una vez que se reabra la factoría.
Nesti sen, señaló que dende Tenneco quierse que na planta xixonesa prodúzanse 1,7 millones de varilla -exe-- al añu, anque nun punxeron reparos a que acabada esta producción puean facer amortiguadores.
Nel casu del personal treslladáu, la Dirección ofrez a los treslladaos a les otres plantes d'España'l caltener l'antigüedá y, p'aquéllos que ganaren más en Xixón, l'igualar el sueldu, asina como una compensación de 500 euros al mes mientres 24 meses pal alquiler de la vivienda y 15.000 euros pol treslláu.
Distinto va ser pa los qu'opten por Alemaña, dao que van perder l'antigüedá, polo que van empezar dende cero, cola retribución que rixa nel país xermanu, y podría hasta camuda-yos la categoría profesional. Pa estos trabayadores ofreceráse-yos una indemnización de 25 díes de salariu con un máximu de 15 mensualidaes.
Piñera apuntó que na xunta, que se prollongó mientres unos dos hores, nun s'encetó el tema de la maquinaria. Ta por ver amás les condiciones d'aquéllos que se prexubilen, una vez que la plantiya aceptara que se rebaxe la edá a los 55 años. El Comité quier que se pague'l 100 por cientu, mientres que la empresa rebaxa'l porcentaxe al 70 por cientu.
