BILBO, 12 (EUROPA PRESS)
Berri Txarrak taldeak "etenaldi mugagabea" egingo du 2019. urterako prestatu duen bira luzea bukatu ondoren, Gorka Urbizu taldeko sortzaile, abeslari eta gitarristak www.berritxarrak.bet web orrian asteazken honetan argitaratutako oharrean jakinarazi duenez. Ikusi Arte Tour 2019 biraren inguruko xehetasunak datozen egunotan argituko ditugu.
Taldeak 25 urteko beteko ditu datorren urtean, eta "ziklo ahaztezin bat ixteko garaia" heldu dela sentitzen duela adierazi du Lekunberriko musikariak, eta "geratzeko eta distantzia hartzeko beharra" duela.
"Horren konplikatua eta sinplea da. Hogeitaka urtetan atsedenik hartu gabe aritu ondoren, egunetik egunera nekezagoa zait higadura emozional eta fisiko honi aurre egitea. Oraintxe bertan gure erritmoak ez doaz parean eta ez gaude %100ean jarraitzeko moduan. BTX-en entzuleek ez lukete ulertuko hala segitzea, eta erabakia benetan zaila den arren, gauden tokian jarri gaituztenenganako errespetua beti egon da talde honen lehentasunen zerrendaren gorenean", azaldu du.
Bere hitzetan, "musika eta sormena ulertzeko modu asko dago, sortzaileak beste ziurrenik. Baina momentu batetik aurrera ezbaian jarri behar da ia dena. Erabaki beharra dago beti atezuan dagoen inertziarekin ze harreman mota eduki nahi duzun. Aroak ixten asmatu eta berriak abiatzen saiatu. Bestela esanda: ikasten segi".
IKUSI ARTE TOUR 2019
Gauzak horrela, 2019rako prestatu duten bira luzearen ondoren, taldeak "etenaldi mugagabea" egingo duela jakinarazi du. Ospakizun bira berezia izango dela ziurtatu du, "ez alperrik 25 urte beteko baitira taldearen sorreratik". Ikusi Arte Tour 2019 biraren inguruko xehetasunak datozen egunotan argituko ditu taldeak.
"Bihotz eta belarri asko hunkitu dugun sentipena daukagu eta zuekin esker oneko agertzea besterik ez zaigu geratzen. Talde bati gerta dakiokeen gauzarik handiena da halako entzulegoa izatea eta horregatik eskerrik asko erraldoiena zuentzako da. Eskerrik asko, orobat, gure senitarteko, lagunarte eta bikotekideei zuen ulerberatasunagatik, gauzak erraz jarri dizkiguzuelako trukean ezer eskatu gabe. Mila esker urteotan guztiotan BTX crew lantalde bikaina osatu duzuenoi, beti izan zarete gure bigarren familia", adierazi du.
Halaber, eskerrak eman dizkie "antolatzaile, zigilu, ekoizle, talde, erakunde, gaztetxe, disko denda, areto, jaialdi, teknikari, musikari, hedabide, lagun, etsai eta rockaren fauna basati honetan beharrezko diren beste hainbat izakiri".
