BILBO, 11 (EUROPA PRESS)
Pedro Campo Cebobi Bizkaiko Merkataritzaren Enpresa Konfederazioko presidenteak eta Xabier Solaetxe Kutxabank Taldeko Bizkaia Sareko zuzendariak bi erakundeen arteko lankidetza akordioa berritu dute asteazken honetan, eta, horrela, eguneratu egin dituzte finantzaketa lortzeko baldintzak, Cecobiren barruan dauden merkataritza establezimenduen berariazko beharrei erantzuteko helburuarekin.
Campok eta Solaetxek positiboki baloratu dute "akordioaren ibilbide emankorra", indarrean egon den urteetan, "atxikitako saltokiei beren egoera lehiakorra hobetzeko aukera eman dielako, produktu eta zerbitzu finantzarioen askotariko sortari esker, lehentasunezko baldintzak baitituzte".
Campok mota honetako hitzarmenen garrantzia nabarmendu du, erakundera atxikitako saltokiek beren negozioetarako "abantailak eta baldintza interesgarriak" lor ditzaketelako. Gainera, azaldu duenez, akordio berrituan "abantailazko baldintza finantzarioak" sartu dira, Cecobik aholkatuta, Enpresak Eskualdatzeko Programan parte hartuko duten ekintzaileentzako. Programaren helburua da ekonomikoki bideragarriak diren enpresen jarraitutasuna.
"Zenbait enpresak ibilbide luzea dute merkatuan eta errentagarritasun frogagarria dute, baina, ez dago jarraituko duen pertsonarik. Helburua da jarduerari eustea, enpresarekin jarraitzeko prest dagoen ekintzaile baten eskutik", gaineratu du.
Bestalde, Solaetxek ziurtatu du Kutxabankek "lehiakortasuna hobetzen lagundu" nahi diela saltokiei eta, horretarako, berariazko produktu eta zerbitzu finantzarioak eskaintzen dizkie, eguneroko kudeaketa errazteko. "Konponbide finantzarioak emateaz gain, elkarteak merkataritza sustatzeko egiten dituen ekintzetan lagundu nahi diegu", azpimarratu du.
PRODUKTU SORTA ZABALA
Cecobiren eta Kutxabanken arteko hitzarmen berriak urtebeteko iraupen luzagarria izango du. Produktu finantzarioen sorta zabala ezartzen du, inbertsiorako zein zirkulatzailerako, eta mailegu bereziak aurreikusten ditu negozioak jarriko diren higiezinak eskuratzeko eta higiezinok altzariz eta ekipamenduz hornitzeko. Halaber, garraio elementuen eta ibilgailuen renting eskaintzak egingo ditu.
Gainera, Cecobin dauden merkataritza establezimenduek Kutxabanken negozio kontua izango dute, hots, negozioen eguneroko kudeaketarako doako zerbitzu sorta. Gainera, Visa Dual eta Visa Classic txartelak eta contactless ST azkar eta seguruak izango dituzte baldintza onenetan.
Horrez gain, akordio berrituan, Kutxabankek abantailazko baldintza finantzarioak sartu ditu, Cecobik aholkatuta, Enpresak Eskualdatzeko Programan parte hartuko duten ekintzaileentzako. Programaren helburua da aberastasuna eta lanpostuak sortzen dituzten eta titularrak erretiroa hartu duelako ez jarraitzeko arriskuan dauden enpresa bideragarriak babestea.
