BILBO, 21 Oct. (EUROPA PRESS) -
Euskaltzaindiak XXIV. Jagon Jardunaldia egingo du azaroaren 14an (egun osoa) eta 15ean (egun erdia), Bilboko Merkataritza Ganberan, 'Arlo sozioekonomikoa euskararen biziberritzean' izenburupean, Euskararen Akademiak bere webgunean jakinarazi duenez.
Sustapen batzordearen ekimenez antolatu den XXIV. Jagon Jardunaldiaren bidez, hausnarketarako, esperientzien trukerako eta elkarlanerako topagunea eskaini nahi du Euskaltzaindiak, sentsibilitate eta ikuspegi ezberdinak bilduz: batetik, arlo sozioekonomikoak euskararen biziberritze prozesuan duen funtzioaz jarduteko eta, bestetik, euskarak arlo sozioekonomikoan dituen etorkizuneko erronkei buruz hausnartzeko.
Jardunaldian landuko diren gaien artean daude hizkuntza gutxiagotuen eta arlo sozioekonomikoaren ikuspegi orokorra, euskararen prozesua eta arlo sozioekonomikoaren analisia, lan munduaren estrategikotasuna euskararen biziberritzean, euskararen egoera arlo sozioekonomikoan, euskararen esperientzia arlo sozioekonomikoan, ikasle eta langabeen ezaugarriak hizkuntzaren aldetik edota euskarak arlo sozioekonomikoan dituen erronkak.
Izen-ematea azaroaren 11 arte zabalik dago, eta info@euskaltzaindia.eus helbide elektronikora idatzita eta 94 415 81 55, 943 42 80 50, 948 22 34 71 eta 055 92 56 426 telefonoetara deituta egin daiteke.
