DONOSTIA, 11 (EUROPA PRESS)
Eusko Jaurlaritzako Lan eta Justizia Sailak ehun bat aditu bilduko ditu asteartean, azaroaren 12an, Donostiako Miramar jauregian, 'Genero arrazoiengatiko soldata arrakalen kontrol publikoa' izenburuko jardunaldian, emakume eta gizonen arteko soldata arrakalari aurre egiteko formulak partekatzeko.
Topaketaren antolakutzaren arabera, Euskadin, emakumeek gizonek baino %24 gutxiago kobratzen dute beren urteko batez besteko soldatei erreparatzen bazaie; termino erlatiboetan, lan egindako ordu bakoitzeko emakumeen ordainsaria %14 txikiagoa da.
Ildo honetan, Jaurlaritzak hainbat ekimen jarri ditu abian arazoari aurre egiteko. Horrela, Lan eta Justizia Sailak kanpaina bat hasi du aurten lan ingurunean genero arrazoiengatik pairatzen diren soldata diskriminazioak salatzera bultzatuz, eta jada salaketak bidera daitezke Lan Ikuskaritzaren edo iruzurraren postontziaren bidez. Gainera, unitate espezifikoak sortu ditu aurten hiru lurraldeetan, berdintasunean espezializatuta dauden lan ikuskatzaileekin.
Jaurlaritzak sustatutako kanpainak datu batzuen egiaztapenak ditu oinarrian. Esate baterako, gizonen eta emakumeen arteko batez besteko soldata arrakala 7.552 eurokoa da Euskadin, eta arrakala handiagoa da zerbitzuen sektorean eta industrian, bai eta trebakuntza txikiagoa behar duten lanetan eta aldi baterako kontratuetan ere.
Arrazoiak desberdinak dira: alde batetik, emakumeek lan egindako ordu bakoitzeko ordainsaria txikiagoa izatea eragiten duten alderdiak daude (zuzeneko soldata arrakala, sektore segregazioa eta lanbide segregazioa, segregazio bertikala edo kristalezko sabaia); bestalde, lanaldiak txikiagoak izatea eragiten duten alderdiak daude (lan iruzurra, zaintzetan erantzunkidetasunik ez izatea, emakumeen jarduera tasa txikia).
TOPAKETA
Donostiako topaketa Jon Azkuek inauguratuko du, Lan eta Gizarte Segurantzako sailburuordeak, eta ondoren eremu desberdinetako hizlariek hartuko dute hitza: Nafarroako Unibertsitate Publikoko irakasle Elisa Sierrak enpresan dauden diskriminazio positiboko neurri zehatz batzuk emango ditu ezagutzera, eta Tulio Rodríguez-Madridejos magistratuak soldata arrakala justiziatik nola ekidin daitekeen erakutsiko du.
Halaber, Estatuko Lan Ikuskaritzako eta Gizarte Segurantzako zuzendariorde nagusi Irene Marín Luengok eta Euskadiko Lan Ikuskaritzako buru Icíar González Carrascok arlo horretan egiten duten lana azalduko dute. Gainera, beste herrialde batzuek arlo horretan izandako esperientziak ere ezagutuko dira jardunaldian, zehazki, Italiako, Portugalgo eta Frantziako esperientziak, soldata arrakalaren aurkako borrokaren arduradunak izango baitira Donostian.
Enpresen ikuspegia ere ezagutuko da, Marta Alaman eta Julio Calvo PriceWaterhouseCoopers aholkularitzako abokatuen bitartez. Abokatu horiek soldata arrakalan dauden "mito eta errealitateak" izango dituzte hizpide, eta Grupo i68, GKN Driveline eta Laboral Kutxa euskal konpainiek beren esperientziak azalduko dituzte.
"Eusko Jaurlaritzak legegintzaldi honetan benetako berdintasuna sustatzeko konpromisoa hartu du. Horregatik, 2018ko azaroaren 27an Euskadin soldata arrakala murrizteko estrategia eta ekintza plan eragilea onartu zuen: bere helburua da Euskadi soldata arrakala txikiena duten Europako bost herrialdeen artean kokatzea 2030erako. Datozen bi urteetan lau jarduketa ardatz, 20 jarraibide eta 60 neurri zehatz garatuko dira eta 283 milioi euro inbertituko dira. Norabide horretan kokatzen da jardunaldi hau eta antzeko beste batzuk", azaldu du.
