A CORUÑA, 4 Jun. (EUROPA PRESS) -

A Cámara de Comercio da Coruña organiza mañá unhas xornadas informativas sobre axudas para a xestión da I+D+i na empresa. Esta acción xorde en resposta á "crecente inquietude do mundo empresarial" por incorporar e aplicar procesos de investigación, desenvolvemento e innovación (I+D+i), que "choca en ocasións" co "descoñecemento" dos incentivos que ofrecen as diferentes administracións para favorecer a innovación.

A xornada enmárcase dentro do interese da Fundación Instituto Tecnolóxico de Galicia por promover que as pequenas e medianas empresas (pymes) incorporen ás súas vantaxes competitivas a innovación baseada na xeración de tecnoloxía propia, propiciada pola posta en marcha de iniciativas de I+D+i.

Ademais perséguese demostrar como este tipo de actuacións son unha aposta efectiva para xerar a curto un aumento de ingresos nas empresas que as asumen ben polas vendas de novos produtos ou servizos que introduzan os resultados dos proxectos de I+D, ben por redución de custos pola implementación de procesos novos ou mellorados procedentes deses resultados.

Nela, Juan Luis Sobreira Seoane, director da Área de Innovación Tecnolóxica e I+D da Fundación, dará a coñecer as diferentes liñas de axudas para actividades de innovación tanto a nivel autonómico e estatal como europeo, os incentivos fiscais dos que se poden beneficiar as empresas e, en fin, exporá diferentes aspectos prácticos que deben de considerarse á hora de solicitar a obtención destas axudas.

O Instituto Tecnolóxico de Galicia é unha fundación privada sen ánimo de lucro que ten como misión mellorar a capacidade competitiva das organizacións, empresas e profesionais de Galicia. O seu traballo está avalado por un padroado do que forman parte a Xunta, as tres universidades galegas, a Confederación de Empresarios de Galicia e os colexios oficiais de arquitectos e enxeñeiros.