MADRID, 23 Oct. (EUROPA PRESS) -
Case oito de cada dez galegos compran por Internet pero só tres de cada dez utiliza a Rede para vender, segundo un informe realizado polo portal especializado na compravenda www.PriceMinister.es entre máis de 1.300 cidadáns maiores de 14 anos.
O estudio revela que, aínda que máis da metade dos galegos, concretamente un 66 por cento, considera que Internet é o medio máis efectivo tanto para comprar como vender, utilízase principalmente para adquirir produtos.
Este portal anuncia unha revolución do comercio electrónico en Internet coa da venda de particulares, que suporá o último paso da consolidación da Web 2.0. "Tendo en conta a situación de desaceleración económica, Internet preséntase como unha boa alternativa para obter novos ingresos xa que se poden vender todos aqueles produtos que xa non se utilizan", sinalaron dende o portal.
De feito, segundo www.PriceMinister.es, un 52 por cento das persoas que venderon a través da Rede en 2007 gañaron máis de 100 euros con esta actividade e un 29 por cento deles obtiveron máis de 300 euros grazas ás vendas realizadas.
En canto ao sexo, o informe destaca que os homes compran e venden máis por Internet que as mulleres, aínda que durante os últimos 12 meses foron elas as que gastaron máis diñeiro comprando en Internet. A maioría declarou gastarse máis de 500 euros mentres que a grande parte dos homes se deixou entre 100 e 300 euros no mesmo período de tempo.
Tamén varían as compras: eles destácanse pola informática e os produtos de imaxe e son mentres que as mulleres o fan pola roupa, os complementos e a cosmética.
