7 de abril de 2020
11 de junio de 2008

O Cesga presentará mañá o supercomputador Finis Terrae para difundir as súas capacidades

SANTIAGO DE COMPOSTELA, 11 Jun. (EUROPA PRESS) -

Santiago acollerá mañá a presentación ao público do supercomputador Finis Terrae, unha das grandes infraestruturas científicas e tecnolóxicas galegas situada no Centro de supercomputación de Galicia (Cesga).

A xornada comezará ás 10.00 horas coa celebración do Cesga-Finis Terrae Computational Science Conference 2008, unha xornada de difusión sobre a capacidade de servizo de cálculo do supercomputador e as experiencias realizadas durante a súa etapa de probas.

Nesta intervirán, entre outros, os responsables técnicos do Centro de supercomputación de Galicia, usuarios con experiencia no aproveitamento da máquina e expertos internacionais en supercomputación.

Ás 18.00 horas farase unha visita institucional ás instalacións do superordenador, na que participarán o presidente da Xunta, Emilio Pérez Touriño; o conselleiro de Innovación e Industria, Fernando Blanco; o secretario de Estado de Investigación do Ministerio de Ciencia e Innovación, José Manuel Fernández de Labastida, entre outras autoridades.

Posteriormente, ás 19.00 horas, está prevista outra presentación ao público do supercomputador Finis Terrae, nesta ocasión no Centro Galego de Arte Contemporánea (CGAC), tamén na capital de Galicia.