A actividade, que se inclúe na 'Semana da ciencia', explica as seis fases deste labor de forma "diferente e próxima"
SANTIAGO DE COMPOSTELA, 10 Nov. (EUROPA PRESS) -
O Laboratorio de Patrimonio do Consello Superior de Investigacións Científicas (CSIC) inaugura hoxe en Santiago o programa 'Arqueocampo', actividade divulgativa coa que pretende "achegar o traballo arqueolóxico" ao público mediante "unha metodoloxía práctica".
O alcalde de Santiago de Compostela, Xosé Sánchez Bugallo, e o director do laboratorio, Felipe Criado, presentarán o evento, que ten un carácter gratuíto e se destina a alumnos e demais persoas interesadas. Así "converteranse en arqueólogos por unhas horas ao experimentar toda a cadea do traballo arqueolóxico", destacou a organización.
A iniciativa conta coa colaboración do Concello de Santiago a través das concellarías de Cultura e Centros Socioculturais e Educación. Ademais, participan a compañía Terceira Persoa Iniciativas Culturais S.L e a Fundación Terra Termarum de Castrolandín. Está financiada pola Fundación Española para a Ciencia e a Tecnoloxía (FECYT).
'Arqueocampo' celébrase dende onte luns ao sábado, en horario de mañá e tarde, no Centro Sociocultural de O Castiñeiriño, na capital galega. As prazas son limitadas logo de reserva e o CSIC prevé que asistan unhas 700 persoas.
SEMANA DA CIENCIA EN GALICIA
"Con esta actividade, que se enmarca na Semana da Ciencia, pretendemos que o público infantil e xuvenil comprenda o proceso de produción de coñecemento que se aplica en arqueoloxía e coñeza destrezas de xestión de coñecemento que pode aplicar nos seus propios procesos de estudio e formación", explicou Felipe Criado, director do laboratorio do CSIC.
Neste sentido, engadiu que buscan "que a cidade de Santiago sexa partícipe do traballo que realiza o Laboratorio de Patrimonio do CSIC". Así, o consello destacou que constitúe unha iniciativa "pioneira e novidosa" coa que explicar aos asistentes "o traballo que día a día levan a cabo os arqueólogos".
"Achegaremos as fases do traballo arqueolóxico á sociedade dun modo diferente e próximo, ao mesmo tempo que divulgaremos a investigación que se leva a cabo sobre a arqueoloxía, a Prehistoria e o Patrimonio", resaltou Martina González, responsable da Unidade de Cultura Científica do laboratorio e coordinadora da iniciativa.
A actividade dura dúas horas e media e consta de seis bloques: unha primeira de escavación, á que lle seguen o tratamento de materiais arqueolóxicos, a manipulación de mostras, a representación, o arquivo de materiais e o gabinete de investigación.
