A CORUÑA, 22 Jul. (EUROPA PRESS) -
Un equipo da Universidade da Coruña, en colaboración coa Fundación Orange, deseñou uns teclados virtuais que facilitarán o uso do ordenador a persoas con algún tipo de minusvalidez. O proxecto, realizado polo Centro de Informática Médica e Diagnóstico Radiolóxico da Universidade da Coruña, estará dispoñible gratuitamente en internet.
Os responsables do proxecto In-Tic (Integración das Tecnoloxías da Información e as Comunicacións nos colectivos de persoas con minusvalidez) presentaron hoxe o seu contido, nun acto no Centro de Novas Tecnoloxías de Galicia, en Santiago de Compostela, coa presenza, entre outros, de representantes da Consellería de Traballo e Benestar da Xunta de Galicia; da Universidade da Coruña e da Fundación Orange.
Segundo informaron hoxe os promotores do proxecto In-Tic, o sistema permite, mediante a creación e configuración de teclados virtuais personalizables que persoas con diversidade funcional (física, cognitiva ou sensorial) poidan utilizar o ordenador, acceder a Internet, comunicarse ou executar aplicacións específicas e mellorar, así, a súa autonomía persoal.
Este sistema tamén pode ser utilizado como comunicador tanto en ordenadores convencionais como portátiles, tabletPCs e teléfonos móbiles e está dispoñible de forma gratuíta para todos os usuarios en Internet nas páxinas web da Fundación Orange, do Grupo RNASA-IMEDIR da Universidade da Coruña e no propio portal da aplicación (www.intic.udc.es).
O proxecto contou co apoio do Plan Avanza do Ministerio de Industria, Turismo e Comercio e durante toda a fase de desenvolvemento e investigación tamén coa colaboración, para as diferentes probas, da Asociación de Pais de Nenos con Parálise Cerebral da Coruña (ASPACE) e da Cruz Roja.
Segundo os seus responsables, as características de personalización, acceso ao ordenador e comunicador para ordenador e teléfonos móbiles, xunto coa súa distribución gratuíta, fano único "xa que hoxe non existe ningunha aplicación destas características a disposición dos colectivos de persoas con minusvalidez", subliñan nun comunicado.
