Consta de tubos flotantes conectados entre si formando calquera xeometría, o que permite "maior flexibilidade" de montaxe

SANTIAGO DE COMPOSTELA, 15 Mar. (EUROPA PRESS) -

Un consorcio de empresas galegas liderado pola Técnica de Envases Pesqueiros (Tepsa) traballan no deseño dunha estrutura alternativa ás bateas tradicionais, que só poden situarse nas rías, e que permitirá a acuicultura en mar aberto.

Para iso, a estrutura, que forma parte do proxecto 'Articuiltura', estará composta por tubos flotantes articulados e pezas de suxeición mediante materiais plásticos resistentes á acción da auga do mar.

Os seus responsables afirmaron hoxe que este sistema permite "maior flexibilidade na montaxe e na produción", ao mesmo tempo que "beneficiará ao medio ambiente" no marco do desenvolvemento sostible.

Ademais, o proxecto conta co respaldo a Consellería de Innovación e Industria, que achega 392.410 euros a través do Programa de Tecnoloxías de Deseño e Produción Industrial del Plan Galego de Investigación, Desenvolvemento e Innovación.

Segundo indicou o departamento que dirixe Fernando Blanco, o obxectivo do proxecto é paliar as limitacións das bateas, relacionadas sobre todo co feito de que só poden situarse en zonas resgardadas das ondas, como as rías.

"FLEXIBLE" E "RESISTENTE".

O material escollido para os tubos é o Polietileno de Alta Densidade (PEAD), que é impermeable, non tóxico e ofrece resistencia a baixas temperaturas e a forzas de tensión ou compresión. Ademais, os tubos poderán ter calquera lonxitude e estarán conectados entre si por pezas de adapte, de modo que se poderán crear estruturas articuladas e con calquera forma xeométrica.

Á vista destas cualidades, Tepsa incide en que a utilidade do sistema radica na súa "flexibilidade" e na "extrema facilidade" para construír estruturas de acuicultura mariña "con garantías de resistir fortes temporais".

PROBAS EN CONDICIÓNS REAIS.

A sociedade Puerto de Celeiro contará coa colaboración do Centro Tecnolóxico da Pesca de Celeiro (Cetpec) para efectuar probas en condicións reais. Ademais, Tepsa realizará probas de resistencia das unións e as súas soldaduras.

Para a realización destas probas construiranse dous tipos de estruturas flotantes, unha gaiola circular pechada con rede para peixes de 50 metros de diámetro e unha 'long-line' de 120 metros de lonxitude formada por catro tubos en paralelo para mexillóns e ostras. Ambos os dous instrumentos probaranse en ría e en mar aberto.

BENEFICIOS ECONÓMICOS E AMBIENTAIS.

Este proxecto é unha actividade complementaria á pesca artesanal que busca diversificar a produción mediante unha redución de custos, posto que os tubos flotantes teñen un prezo inferior ao das actuais bateas, e tanto a instalación como as posibles reparacións son "rápidas e con pouco custo".

Ademais, os responsables do proxecto explicaron que a forma articulada de liñas permite absorber "boa parte dos esforzos" que o movemento das ondas exerce sobre a estrutura e, no caso de que rompa un dos tubos, perderíase a flotabilidade dun tramo de 12 metros, non de toda a estrutura.

No ámbito ambiental, a importancia do proxecto vén dada pola "non alteración da paisaxe natural e pola eliminación de sedimentos orgánicos nas rías, que se dispersarán, con este sistema, en mar aberto.

Por outra banda, o PEAD é un material reciclable na propia fábrica de orixe, polo que non necesita que se apliquen produtos para a súa conservación.

Finalmente, Innovación e Industria confirmou que o proxecto require un estudio de mercado que avalíe a súa integración no sector e, de confirmarse a súa viabilidade, esta fase de I+D "será o primeiro paso para unha posterior etapa de industrialización e comercialización".