VIGO, 11 Sep. (EUROPA PRESS) -

Expertos en robótica participan no Workshop de Axentes Físicos que hoxe se inaugurou na Escola Técnica Superior de Enxeñeiros Industriais da Universidade Vigo e que, ata mañá, servirá de foro de debate para especialistas na materia así como de escenario para diferentes demostracións.

O acto inaugural contou coa presenza do alcalde, Abel Caballero, quen destacou a importancia de "dar respaldo aos investigadores desde os ámbitos públicos" así como promover a difusión dos seus traballos que, "sen este tipo de eventos non sairían á luz".

Pola súa banda, o reitor olívico, Alberto Gago, confirmou a aposta "prioritaria" por este ámbito e destacou que a pesar de tratarse dunha institución "xeneralista", a Universidade de Vigo "ten un marcado carácter tecnolóxico".

Ao longo das dúas xornadas que dura o 'workshop', os participantes asistirán a diferentes demostracións, algunhas das cales celebráronse hoxe tras o acto inaugural. Así, alumnos e docentes da Universidade mostraron pequenos robots bípedos de uso doméstico elaborados polos propios estudantes. Entre eles figura o denominado INTRE, un robot da propia institución académica que, a través de sensores infravermellos e varras láser, guiou aos asistentes a través das instalacións de Industriais.

Outra das liñas nas que se traballa en Vigo é a intelixencia artificial dedicada á vixilancia, da que tamén existen mostras. Finalmente, xa na zona destinada a demostracións, pódense observar modelos de marcas comerciais e destinados a uso industrial, capaces de soldar ou atornillar, entre outras accións.