Os Irmandiños ultima un sistema para implantar "unha agricultura de precisión" que poida ser comercializado no futuro
SANTIAGO DE COMPOSTELA, 7 Dic. (EUROPA PRESS) -
A Cooperativa Os Irmandiños S.C.G, localizada en Ribadeo (Lugo), ultima un sistema que optimiza a xestión da maquinaría agrícola que utilizan en común os seus socios e que permite mellorar os tempos de traballo e de transporte e un aforro de man de obra ao rexistrar directamente nun ordenador todos os datos que antes había que contabilizar de xeito manual.
Así o explicou a Europa Press Santiago Sousa, responsable técnico deste proxecto que se realiza en colaboración coa Universidade de Santiago de Compostela (USC) e coa colaboración económica da Consellería de Innovación e Industria, quen destacou que o obxectivo é lograr un sistema que permita implantar "xestión eficiente e unha agricultura de precisión" que no futuro poida ser comercializado.
O sistema elixido, a través de GPS e Sistema de Información Xeográfica (SIG), achega información en tempo real da posición e o estado da flota de maquinaria, rexistra os parámetros máis importantes do seu funcionamento, automatiza procesos de facturación e control de flotas, alarma ao condutor e ao centro de control de disfuncións en elementos clave, asiste á navegación do condutor e posibilita o envío de mensaxes entre este e o centro de control.
Antes de implantar esta innovación a única forma posible de coñecer a posición dunha máquina ou calquera a súa incidencia era a través dunha chamada telefónica entre o condutor e a cooperativa. Con esta mellora non hai necesidade de que interveña a persoa que guía a máquina, senón que calquera información ou problema se transmite en tempo real ao centro de control.
A Cooperativa Os Irmandiños comezou primeiro cun proxecto para as cultivadoras, que se prolongou durante tres anos e concluíu en 2006. Tras dous anos en probas e cun prototipo comprobouse que funcionou de xeito eficaz, o que lle levou a dar un paso máis e que abordará esta innovación nun tractor.
Así, dende 2007 trabállase en aplicar un software "máis completo", segundo Santiago Sousa, pois un tractor ten máis funcionalidades que unha cultivadora, e xa está instalada nun dos tres que ten en propiedade a cooperativa, ademais de contar con adaptadores para implantalo noutros cando botan man de autónomos e empresas de servizos para levar a cabo os servizos de campaña.
COMERCIALIZACION
Na actualidade estase a concluír a xestión para patentar o sistema desenvolvido no primeiro proxecto -o referido ás cultivadoras- e, unha vez que se perfeccione o dos tractores- farase o propio, co fin de que "nun futuro" poida comercializarse, "dunha forma directa ou indirecta", esta iniciativa e beneficiar desta a outras cooperativas que manexan en común maquinaria, segundo expuxo Santiago Sousa.
A optimización da xestión nas cultivadoras requiriu unha inversión de 280.000 euros, dos que a metade foron achegadas pola Consellería de Innovación, e para implantar o sistema nos tractores se estima un custo 210.000 euros, sufragados nun 35 por cento polo departamento autonómico.
Irmandiños prestou unha grande atención á ergonomía do sistema para colocar a pantalla táctil nunha posición que se facilitar a introdución de datos e a visualización da información, todo iso sen interferir coa visión dos órganos mecánicos da máquina. Outra grande virtude deste modelo é a práctica ausencia de mantemento e a doada adaptación dos operarios ao seu manexo.
Esta cooperativa, integrada por 1.054 socios entre os que atopan outras cooperativas como O Caxigo, O Pereiro e O Searín, dedícase á fabricación de pensos, materias primas alternativas e produtos para camas de vacas. Ofrece servizo de mecanización agrícola e de carro mesturador. Dispón de tenda agropecuaria e produtos varios, taller de recambios rápidos, punto limpo, ademais de comercializar gando.
Así mesmo, conta con instalación de limpeza de fabas e un amplo equipo de servizos técnicos agropecuarios e veterinarios e de asesoría fiscal e contable. Recentemente iniciouse a posta en marcha dun ambicioso proxecto de "sistema de mestura húmida" co que ofrece aos seus asociados un servizo integral de alimentación, no que se integran os sistemas de fabricación de penso, mecanización e recolección de forraxe e asesoría en nutrición animal.
