PONTEVEDRA, 20 Jun. (EUROPA PRESS) -
O director xeral de Investigación, Desenvolvemento e Innovación, Salustiano Mato, presentou hoxe á comunidade universitaria do campus de Pontevedra o programa de recursos humanos de I+D+i para 2007, unha iniciativa coa que a Xunta pretende poñer fin ao déficit de investigadores científicos na Comunidade galega.
Durante a presentación deste programa, á que asistiron investigadores, profesores e demais membros da universidade, Salustiano Mato explicou que a Consellería de Industria destinará 30 millóns de euros un 120 por cento máis que o ano pasado, para a contratación de 500 investigadores e tecnólogos, "que permitirán desprecarizar a situación laboral dos que optan por esta vía de traballo".
"Esta convocatoria de axudas constitúe a maior aposta cuantitativa e cualitativa feita en Galicia polos recursos humanos en I+D+i e pola súa desprecarización, situando a nosa comunidade entre as máis avanzadas do Estado español neste sentido", indicou.
Para desenvolver este programa, a Xunta pon en marcha unha carreira científica destinada á formación e consolidación do persoal investigador co obxectivo de "crear líderes de investigación coa incorporación de investigadores de alto nivel", e, ademais, créase a denominada carreira tecnolóxica que terá como fin aumentar a capacidade en recursos humanos dos centros de I+D, tanto públicos como privados.
Co fin de completar este programa, a Administración autonómica destinará dous millóns de euros para estanzas de investigadores no estranxeiro ou en centros españois situados fóra de Galicia, para "fomentar a mobilidade, cubrindo gastos de viaxe, seguro de accións e cunha asignación mensual que lles permita formarse cos mellores investigadores europeos", afirmou Salustiano Mato.
