SANTIAGO DE COMPOSTELA, 17 Nov. (EUROPA PRESS) -

O Auditorio de Ourense acollerá dende mañá a feira científica 'Galiciencia' que, dedicada á investigación realizada polos "máis novos", contará con 34 stands de proxectos de estudantes de secundaria de Galicia e Cataluña co obxectivo de superar os 2.100 visitantes.

Deste modo, ata o xoves poderanse visitar proxectos sobre as hormonas e as feromonas e a súa relación co amor; e as enerxías renovables e varios métodos para obter enerxía a través dos peixes, os ascensores e o aceite de cociña.

Segundo informou hoxe a Consellería de Innovación e Industria, prevese que visiten 'Galiciencia' un total de 43 grupos de máis de 35 colexios galegos, así como familias e particulares.

Ademais, o obxectivo desta feira pasa por erixirse en "punto de encontro" entre os investigadores máis novos de Galicia, con talleres, exposicións, ciclos de cinema científico e conferencias dirixidas a novos e tamén a adultos.

Por outra parte, Expourense e a Escola Superior de Enxeñería Informática da Universidade de Vigo organizan a oitava edición do concurso de proxectos tecnolóxicos para dar a coñecer os proxectos de fin de carreira dos estudantes de Informática e de Telecomunicacións

A finalidade deste certame é vincular a investigación da universidade co mundo empresarial, polo que terán cabida os traballos nos que prime "unha clara aplicación" das súas ideas ao mundo empresarial; e a principal novidade deste ano céntrase en que ademais dos universitarios de Galicia, tamén poderán participar os das universidades portuguesas.